АҚШ касалликлар назорати ва профилактикаси маркази олимлари илк бор инсонга паразитлардан саратон касали юқишини қайд этди. Бу ҳақда New England Journal тиббий нашрида чоп этилган мақолада маълум қилинди, дея хабар беради «Корреспондент.net».
ВИЧ-инфекцияга чалинган 41 ёшли эркакда саратонга ўхшаш ўсимталар аниқланган. Унга саратон ҳужайралари митти лентасимон гижжа (Hymenolepis nana) орқали ўтган. Колумбиянинг Меделин шаҳрида истиқомат қилувчи эркак шифокорларга бир неча ойдан бери безгак тутаётгани, йўтал, чарчоқ ҳамда вазн йўқотаётгани устидан шикоят билан мурожаат қилган. Тадқиқотлар мижозда саратонга ўхшаш ўсимталар мавжудлигини кўрсатди, бироқ саратон ҳужайралари инсонда учрайдиганларига қараганда жуда кичик эди.
«Биз лентасимон гижжалардан инсонга ўтадиган бу янги хасталикни аниқлаганимизда ҳайратда қолдик. Мазкур ҳолат анча ноёб ҳодиса, бироқ бу паразит бутун дунёда тарқалган. Миллионлаб одамлар иммун тизимини заифлаштирадиган ВИЧга ўхшаш хасталиклардан азият чекади», — дея таъкидлаган тадқиқот муаллифларидан бири Атис Мюленбахс.
Олимларнинг айтишича, саратон бошқа ҳайвонларга ит, Тасмания иблиси ва моллюскалардан ўтиши маълум, аммо бу инсонга паразитлар томонидан биринчи бор саратон «юқтирилиши».
Изоҳ (0)