Япониянинг Mazda автомобилсозлик компанияси ёниб кетиш эҳтимоли аниқлангани сабаб, бир неча миллион дона эски машиналарни чақириб олади. Бу ҳақда 3DNews хабар бермоқда.
Таъмирталаб автомобиллар рўйхатига умумий ҳисобда 4,9 миллион автомобиль кирган, уларнинг 1,36 миллион донаси АҚШда эканлиги айтилмоқда. АҚШ бозоридан Mazda 323 (1990—1996 йилларда ишлаб чиқарилган), Mazda 626 (1993—1998), Mazda 929 (1993—1995), Mazda MX-6 (1993—1997), Mazda MPV (1986—1998) ва Mazda MX3 (1992—1993) моделлари чақириб олинади.
Мазкур машиналар ишлаб чиқарилган заводларда ўт олдириш блокларидаги электр контактларига ҳаддан ташқари кўп мой (смазка) суртилган. Вақт ўтиши билан мазкур модда учқун таъсирида кўмирланган ва электроизоляциявий хоссаларини йўқотган. Транспорт воситасидан тез-тез фойдаланиш оқибатида ўт олдириш қулфи қизиб кетади, бу ҳолатда тутун пайдо бўлиши ва ҳатто ёнғин келиб чиқиши мумкин.
Mazda’нинг расмий статистикасига кўра, ушбу носозлик сабаб бутун дунё бўйлаб компаниянинг 13 автомобили ёниб кетган. Қайд этишларича, мазкур муаммо хавфсизлик тизими ва автомобилнинг бошқа агрегатлари фаолиятига таъсир қилмайди, шунингдек, двигатель ўчиқ вақтда ёнғин юз бериши хавфи мавжуд эмас.
2015 йил декабридан бошлаб носоз деб тахмин қилинаётган автомобилларнинг эгалари, зарурат туғилганида, Mazda’нинг дилерлик марказларига ташриф буюриб, ўт олдириш қулфини бепул алмаштириб олиши мумкин.
Изоҳ (0)