Алишер Навоий номидаги кино саройида Korean week – 2015 маданият ҳафталиги очилди. Тадбирда вазирлик ва идоралар, дипломатик корпус вакиллари, санъатшунослар ва кино ихлосмандлари иштирок этди, деб хабар беради ЎзА.
Корея Республикасининг Ўзбекистондаги Фавқулодда ва мухтор элчиси Ли Ук Хон Ўзбекистон билан Жанубий Корея ўртасидаги ҳамкорлик барча жабҳалар қатори маданий-гуманитар соҳада ҳам равнақ топаётгани, бунда икки давлат раҳбарлари учрашувлари чоғида эришилган келишувлар муҳим ҳуқуқий асос бўлиб хизмат қилаётганини алоҳида таъкидлади.
Маданият ҳафталиги Жанубий кореялик ижодкорлар томонидан суратга олинган «Мисс бувижон» фильми намойиши билан бошланди. Ҳафта давомида «Архитектурада янгилик», «Донмакголга хуш келибсиз!», «Менинг севгим, менинг қайлиғим», «Синчков» номли фильмлар намойиш этилади. Тошкент, Урганч ва Нукус шаҳарларида қатор маданий тадбирлар, жумладан, корейс киноси фестивали, болалар ва ўсмирлар учун футбол ҳамда корейс халқ амалий санъати бўйича маҳорат дарслари, «Жанубий Корея билан Ўзбекистон ўртасидаги дўстлик» мавзусида тасвирий санъат танлови ўтказилиши режалаштирилган.
Изоҳ (0)