23-октаб куни Алишер Навоий номидаги кино саройида «Ўзбеккино» Миллий агентлиги буюртмасига асосан «Ватан» киностудиясида суратга олинган ўткир сюжетли драма жанридаги «Ажал жодуси» бадиий фильмининг тақдимоти бўлиб ўтади. Бу ҳақда «Ўзбеккино» МА матбуот хизмати «Дарё»га маълум қилди.
2014 йилнинг декабрь ойида ишлаб чиқаришга туширилган мазкур фильмни суратга олиш ишлари Тошкент вилоятининг Чорвоқ ва Сўқоқ ҳудудларида, шунингдек, Россия Федерацияси таркибидаги Бошқирдистон Республикасида амалга оширилди.
Режиссёр Ҳилол Насимов томонидан суратга олинган ушбу фильмда бутун дунёда жиддий муаммога айланган ноқонуний миграция ва унинг оқибатида юзага келадиган муаммолар – қонунни четлаб ўтган ҳолда, хорижий мамлакатга бориб, ноқонуний меҳнат муҳожирига айланган шахсларнинг машаққатли меҳнати, ҳуқуқсизликдаги оғир ҳаёти ва баъзан аянчли тугаётган қисмати ҳақида ҳаётий мисоллар асосида, таъсирчан йўсинда ҳикоя қилинади.
Дабдабали тўй қилиб, қарзга ботган оила аъзолари жиддий муаммога дуч келади. Оқибатда ота ва унинг икки ўғли пул топиш илинжида мавжуд қонун-қоидаларни четлаб ўтиб, ноқонуний тарзда хорижга ишлаш учун йўл олади. Аммо улар ўзга юртда ҳуқуқсизликда яшаб, аянчли воқеаларни бошдан кечиришга мажбур бўлади. Ана шундай саргардонликлар оқибатида ота вафот этади.
Фильмда Муяссар Бердиқулова, Ширин Исмоилова, Баҳодир Муродов, Шоҳруҳ Насимов, Фотиҳ Насимов ва бошқалар рол ижро этган.
Режиссёр Ҳилол Насимов бунгача ҳам ижтимоий буюртма асосида «Алданган аёл», «Тубанлик», «Одноклассники.ру», «Гумроҳлар» каби фильмларни суратга олган.
Изоҳ (0)