Тошкент шаҳрида асосан 17 октябрда кун давомида кузатилган ёғингарчилик оқибатида марказий чорраҳалар сув остида қолди. Бу ҳолатни тасдиқловчи суратлар Facebook’даги «Водители Ташкента» гуруҳида эълон қилинган.
Фойдаланувчилардан бири шаҳарнинг Шота Руставели кўчасидаги вазиятни бир неча суратларда акс эттиришга ҳаракат қилган. «Водители Ташкента» аъзоси тақдим этган суратлар асосан Муқимий ва Руставели кўчалари кесишмасидаги айлана атрофида олинган.
Фотосуратларда айлана атрофи тўлиқ сув остида қолгани, автомобиллар «сузиб юргани», ариқлар кўринмай кетгани, шаҳар ободонлаштириш бошқармаси ходимлари вазиятни тартибга солишга уринаётганини кўриш мумкин.
«Бутун Шота Руставели кўчаси шу аҳволда. Ирригация/дренаж тизими амалда ишлаётгани йўқ. Мабодо жала қуйиб қолса нима бўлади?», — дейди фойдаланувчи. Марказий кўчалар, чорраҳаларнинг сув остида қолиши ҳолатлари бошқа жойларда ҳам юз берган.
«Водители Ташкента» гуруҳида эълон қилинган эътиборга молик суратлардан бири Мирзо Улуғбек ва Паркент кўчалари кесишмасида олинган. Сурат остидаги изоҳларда аксарият фойдаланувчилар пиёдалар йўлдан қандай ўтаётганига қизиққан.
«Ёмғир — Тошкент учун табиий офат», — деб фойдаланувчилардан бири алам аралаш фикр билдирган бўлса, «Айём» вокал-чолғу ансамблининг Facebook’даги саҳифаси вазиятга юмор ҳисси билан ёндашиб, актёр Мурод Ражабовнинг «Тангалик болалар» фильмидаги қўшиғидан иқтибос келтирган: «Балиқ бўлиб сузгум бор!».
Изоҳ (0)