Ўзбек шоу-бизнесида нима гаплар? (фото)

My Day нашри ўзбек шоу-бизнеси оламидаги янгиликларни дайжест кўринишида тақдим этди.

Юлдуз Усмоновадан янги туркча альбом

Ўзбек эстрадасининг примадоннаси Юлдуз Усмонова Туркиядаги мухлислари учун навбатдаги янги туркча «Hayat Bana Ask Borcun Var» номли альбомини чиқарди. Альбом ўнта трекни ўз ичига олган. Альбомдан Яшар билан ижро этилган «Вур-вур» дуэт қўшиқ ҳам жой олган. У Туркиянинг барча мусиқа дўконларида сотувга чиққан.

Шунингдек, хонанда «Тошкент» таронаси учун клип суратга олдирди. Съёмка ишлари Сўқоқ қишлоғида бўлиб ўтди.

Улуғбек Раҳматуллаевдан янги тарона

Улуғбек Раҳматуллаев ноябрь ойидаги концерт дастурига қизғин тайёргарлик кўрмоқда. Ундан ташқари, хонанда ижод қилишдан тўхтамай, тез орада мухлислари талабига биноан «Қайтар дунё» таронасини премьера қилиш арафасида.

Азиза Низомова нималар билан банд?

Turkvizyon 2014 мусиқий танловининг иштирокчиси Азиза Низомова ҳам қизғин ижод билан банд. Азиза тез орада Москва шаҳрига кастингга йўл олиши ҳақида нашрга хабар қилди, аммо хонанда қандай кастингда иштирок этишини сир тутди. Бундан ташқари Азиза студияда кунига 4—5 та қўшиқ ёзади. Кўпгина машҳур хонандалар айнан Азизанинг вокалини маъқул кўради ва унинг овозини бэк вокалда эшитиш мумкин. Ижодкор кўпгина хонандаларга шеър ва мусиқа ҳам ёзиб беради.

Манзурадан яна бир дуэт қўшиқ

Хонанда Манзура ҳам тиним билмай ижод қилишда давом этмоқда. У Тоҳир Усмонов билан дуэт қўшиқ ижро этди ва унга клип ҳам тасвирга олдирди.

Хонанда Сардор Мамадалиев ва актёр Акбархўжа Расулов бўйдоқлик билан хайрлашди

2015 йилнинг 12 октябрь куни бирваракайига икки истеъдод эгалари бўйдоқлар сафини тарк этди. Шу куни актёр Акбархўжа Расулов ва хонанда Сардор Мамадалиевларнинг никоҳ оқшомлари бўлиб ўтди.