Эдвард Сноуденнинг Twitter’даги биринчи хабари деярли 90 минг марта ретвит қилинди

АҚШ махсус хизматлари собиқ ходими Эдвард Сноуден Twitter ижтимоий тармоғида саҳифа очди.

«Энди мени эшитяпсизми?» — деб ёзди Марказий разведка бошқармаси ходими микроблогдаги биринчи хабарида. Уни ҳозиргача 89 минг мартадан кўпроқ ретвит қилишди, Сноуденнинг саҳифасига эса 830 мингдан зиёд фойдаланувчи обуна бўлди.

Can you hear me now?

— Edward Snowden (@Snowden) September 29, 2015

Эдвард Сноуден билан боғлиқ можаро 2013 йил июнида келиб чиққан эди. Ўшанда у АҚШ махсус хизматлари интернет ва мобил алоқа орқали бутун дунёдаги фойдаланувчиларни кузатиб боргани ҳақидаги махфий ахборотларни фош этган эди.

2013 йилнинг 1 август куни Россия ҳукумати АҚШ махсус хизматларининг собиқ ходимига бир йиллик муддатга вақтинчалик бошпана беришга қарор қилган эди. 2014 йил 7 август куни эса Эдвард Сноуден уч йил муддатга Россия Федерациясида истиқомат учун гувоҳномага эга бўлди.