Молдова президенти Николае Тимофти ҳукуматга қарши норозилик намойишлари ва пойтахт Кишинёв марказидаги чодирлар шаҳарчасининг асосий ташкилотчиси — «Шаън ва ҳақиқат» фуқаролик платформаси вакиллари билан учрашди. Бу ҳақда «Газета.ru» хабар бермоқда.
«Президент Николае Тимофти намойишчилар томонидан илгари сурилган талабларга жавоб бераркан, ўзи ҳам намойишчилар сингари — мамлакат президенти умумхалқ сайлови йўли билан танланиши керак, деган фикр тарафдори эканлигини маълум қилди. Президент мамлакатда адлия, молия-банк соҳаларида мавжуд муаммолардан хавотирда эканлигини тасдиқлаб, инқирозли ҳолатни зудлик билан тартибга солиш бўйича ўз ваколати доирасида қонуний чоралар кўришини маълум қилди», — дейилади Молдова президенти матбуот хизмати хабарида.
Фуқаролик платформаси вакилларининг қайд этишича, улар ортиқ президент истеъфосини талаб қилмайди. Бироқ, уларнинг фикрича, мамлакатдаги молия-банк соҳасидаги инқирозга сабабчи бўлган Миллий банк раҳбари, бош прокурор, коррупцияга қарши кураш маркази бошлиғи, олий адлия кенгаши раиси ўз лавозимини бўшатиб қўйиши керак.
Аввалроқ, Молдова президенти қароргоҳи олдида норозилик намойишлари давом этаётгани ҳақида хабар берилган эди.
Изоҳ (0)