2015 йил 15—17 сентябрь кунлари Ўзбекистон Миллий кутубхонасида ЮНЕСКОнинг «Жаҳон хотираси» дастурига ноёб ҳужжатли меросларни тақдим этиш бўйича ўқув-машғулотлари ташкил этилди. Бу ҳақда Миллий кутубхона расмий сайти хабар бермоқда.
Мазкур тадбирдан кўзланган мақсад – Ўзбекистонда жаҳонда ноёб ҳисобланмиш ҳужжатли мерослар рўйхатига лойиқ манбаларни аниқлаб, уларни белгиланган усулларга мувофиқ асрашга ҳамкорлик қилиш, ноёб ҳужжатли меросга оммавий тарзда фойдаланиш учун кўмак бериш, ноёб ҳужжатли мероснинг маъно-мазмуни ва мавжудлиги ҳақидаги маълумотни бутунжаҳон даражада тарғиб қилиш.
Ўзбекистон Миллий кутубхонасида ўз ишини бошлаган тадбирда «Жаҳон хотираси» реестрини қайта ишлаб чиқишга номзодлар тавсия этилади, бу жараёнда ОАВларни жалб этиб, оммабоп ахборот материалларни нашр этиш масалалари муҳокама этилади. 3 кун давомида мутахассислар Ўзбекистон Миллий кутубхонаси «Қўлёзмалар, нодир ва алоҳида қимматга эга нашрлар» хизмати фонди ҳақида, у ерда сақланаётган нодир китоблар паспортини яратилиши тўғрисида, «Жаҳон хотираси» дастури бўйича 2014 йилда Бишкекда ўтказилган ЮНЕСКО минтақавий ўқув-машғулоти ҳақида, «Жаҳон хотираси» дастури доирасида ноёб ҳужжатли меросларни тақдим этиш бўйича лойиҳаларни тайёрлаш тартиби тўғрисида маърузалар тингланади. Хорижий давлатлар томонидан тайёрланган ноёб ҳужжатли меросларнинг номзодномалари таҳлил этилади, «Жаҳон хотираси» дастури доирасида ноёб ҳужжатли мерос сифатида тавсия этилаётган Ўзбекистон Миллий кутубхонаси фондида сақланаётган «Ал-Аҳком» (Мовардий) қўлёзмаси, Самарқанд, Бухоро ва Андижон вилоят музейлари, «Билим», «Турон» ахборот-кутубхона марказлари ва «Ўзархив» агентлиги номзодномаларининг тақдимотлари ҳавола қилинади.
Тадбирда Ўзбекистон Республикаси ахборот технологиялари ва коммуникацияларни ривожлантириш вазирлиги, Маданият ва спорт ишлари вазирлиги тасарруфидаги ахборот-кутубхона муассасалари, Ўзбекистон Миллий кутубхонаси, «Ўзархив» агентлиги ходимлари иштирок этди.
Изоҳ (0)