«Навбаҳор» футбол клуби ярим ҳимоячиси Алибобо Раҳматуллаев фаолиятини Озарбайжоннинг «Раван» клубида давом эттиради. Бу ҳақда, «Навбаҳор» матбуот хизматига асосланиб, «Stadion.uz» хабар бермоқда.
Қайд этишларича, Олий Лига-2015 биринчи даврасини «Бухоро» таркибида ўтказган Алибобо Раҳматуллаев иккинчи давра арафасида «Навбаҳор»га қўшилган эди, бироқ унинг шартномасида футболчига хориждан яхшироқ таклиф тушса уни ҳеч бир муаммосиз қўйиб юбориш борасида банд бор эди.
«‘Раван’ машғулотларида қатнашган футболчининг ҳаракатлари клуб вакилларига манзур бўлгач, Раҳматуллаевга шартномани таклиф қилишди. Шундан сўнг, Алибобо «Навбаҳор»га бу борада мурожаат қилди. Ўзаро келишган ҳолда шартнома бекор қилинди», — дейилади «Навбаҳор» хабарида.
Маълумот учун, 2007 йили ташкил топган Бокунинг «Раван» клуби айни вақтда Озарбайжон Премьер-лигасининг дастлабки уч туридан сўнг, 2 очко жамғариб, 10 жамоа орасида 8-поғонани эгаллаб турибди. Алибобо янги жамоасидаги дебютини 13 сентябрь куни «Нефтчи»га қарши дербида амалга ошириши мумкин.
Изоҳ (0)