«Россия 1» телеканалининг «Главная сцена» («Бош саҳна») лойиҳасининг янги мавсумида Наргиз Зокирова ушбу шоу бошловчиларидан бири бўлади, дея хабар бермоқда «Anons.uz».
Кўрсатувнинг янги мавсумдаги биринчи сони 13 сентябрь куни 17:30 да «Россия 1» телеканали орқали намойиш этилади.
Янги мавсумда Наргиз Эрнест Мацкявичус билан биргаликда иштирокчиларни қўллаб-қувватлайди, ҳакамлар билан баҳслашади ва овоз бериш натижаларини ҳисоблайди.
Наргиз Зокирова 1971 йил Тошкентда санъаткорлар оиласида туғилган. У таниқли опера қўшиқчиси, театр ва кино актёри, Ўзбекистон халқ артисти Карим Зокировнинг набираси. Наргиз 14 ёшида Юрмаладаги қўшиқлар танловида қатнашган. 90 йилларда ўзбек эстрадасида ижод қила бошлаган. 1995 йилда АҚШга кўчиб кетган ва орадан 20 йил ўтиб, 42 ёшида Россия саҳнасида кўриниш берди.
Наргиз Зокировага у «Голос» телетанлови саҳнасига чиққан илк дақиқалардан бошлаб кўпчилик қизиқиш билдирди. Бунга сабаб хонанданинг ташқи кўриниши, ноодатий имиджи, дейиш мумкин. У ноанъанавий соч турмаги, бош ва қўлларида татуировкалар, турли тақинчоқлар билан мутлақо «ўзбекча» бўлмаган кўринишда саҳнага чиқди. Наргиз «Голос» лойиҳасида иккинчи ўринга муносиб деб топилган эди.
Изоҳ (0)