Сараево шаҳри (Босния ва Герсеговина)да спорт курашлари бўйича ўсмирлар ўртасида ўтказилаётган жаҳон чемпионатида юнон-рум кураши бўйича мусобақалар якунига етди, деб хабар бермоқда «Оламспорт».
Эътиборлиси, мазкур мусобақаларда Ўзбекистон шарафини ҳимоя қилган Тўрабек Тиркашев (-46 кг) барча рақиблари устидан ғалаба қозониб, олтин медалга сазовор бўлди. Саралаш баҳсларида Айстис Лаугминас (Литва) ҳамда Султан Олжас (Қозоғистон)ни мағлуб этган истеъдодли спортчи ярим финалда Каито Инаба (Япония)ни, финалда эса Керем Камол (Туркия)ни мағлуб этди.
Эслатиб ўтамиз, Тўрабек Тиркашев жорий йилнинг 11—14 июнь кунлари Ҳиндистонда ўсмирлар ўртасида бўлиб ўтган Осиё чемпионатида бронза медалига сазовор бўлган эди.
Юнон-рум кураши бўйича бўлиб ўтган мусобақаларда иштирок этган яна бир ўзбекистонлик умидли спортчи Абубакр Алимов (-69 кг) бешинчи ўринни эгаллади.
Изоҳ (0)