Жанубий Корея ва КХДР ўртасида ҳар иккала томон вакиллари иштирокидаги музокараларнинг иккинчи давраси якунлари бўйича эришилган келишув Корея ярим оролидаги тангликни юмшатишга ёрдам беради. Бу ҳақда Япония бош вазири Синдзо Абэ айтиб ўтди, деб ёзади «ТАСС».
«Биз Жануб ва Шимол ўртасида эришилган битимни маъқуллаймиз. КХДР провакацион хатти-ҳаракатлардан тийилади, келишув эса минтақада кескинликни юмшатишда, шунингдек, қолган масалаларни ҳал қилишда ёрдам беради, деб умид қиламиз», — деди у.
Япония ташқи ишлар вазири Фумио Кисида, ўз навбатида, Токио ушбу вазият юзасидан Сеул ва Вашингтон билан жипс алоқада эканлигини таъкидлади.
КХДР ва Жанубий Корея тахминан 34 соат давом этган музокараларнинг иккинчи даврасида келишувга эришди. Унга кўра, Сеул радиокарнайлар орқали КХДРга қарши тарғибот эшиттиришларини тўхтатади. Пхеньян, ўз навбатида, чегара яқинида жанубий кореялик аскарларнинг минадан портлаши юзасидан кечирим сўради.
Изоҳ (0)