Қорақалпоғистондаги Игорь Савицкий номли Давлат санъат музейи коллективи директор Мариника Бобоназарованинг ишдан бўшатилишига қарши чиқди, дея хабар бермоқда «Газета.uz» музей сайтига жойланган норозилик хатига асосланиб.
«Биз бир ойдан ошиқ вақт давомида коллективимизга ўтказилаётган босим ва муаммоларни ортиқ яшира олмаймиз. Музейнинг 100 йилиги муносабати билан ўтказиладиган байрам тадбирлари арафасида директоримиз ноқонуний равишда ишдан бўшатилиши ҳолатига жамоатчилик эътиборини қаратишни сўраймиз. Коллектив содир бўлаётган қонунсизликдан норози», — дейилади матнда.
Ходимларнинг Ўзбекистон маданият ва спорт ишлари вазири Баҳодир Аҳмедовга йўналтирилган мактубида айтилишича, улар хорижий ОАВларда эълон қилинган уйдирма хатга нисбатан чуқур норозилигини билдиради. «Хатда келтирилган фактларнинг ҳеч қайси бири ҳақиқатга тўғри келмайди», — дея таъкидланади унда.
Дунёга таниқли музей ходимлари маданият ва спорт ишлари вазирлигидан юзага келган вазиятга ойдинлик киритиш, туҳмат хати муаллифини аниқлаш ва уни жавобгарликка тортишни сўради.
Улар, шунингдек, музей фондлари бўйича инвентаризация текширувини ўтказиш тартибининг бузилиши юзасидан тергов ташкил қилиб, музейга нисбатан қўйилган коллекциядаги экспонатларни ўғирлаш айбловини ўрганиш учун эксперт комиссияси тузишга чақирмоқда.
Изоҳ (0)