Қашқадарё вилоятидаги «Деҳқонобод калийли ўғитлар заводи» унитар корхонасида Ўзбекистон Президентининг «Деҳқонобод калийли ўғит заводини ишлаб чиқариш қувватини кенгайтириш (II-босқич)» инвестицион лойиҳани амалга ошириш чора-тадбирлари тўғрисида»ги қарорига мувофиқ, технологик жараёнлар босқичма-босқич амалга оширилиб, жаҳон бозорида рақобатбардош маҳсулот ишлаб чиқариш кўлами кенгайтирилмоқда. Бу ҳақда ЎзА хабар бермоқда.
Бугунги кунда 1 минг 800 дан зиёд малакали ишчи-хизматчи меҳнат қилаётган «Деҳқонобод калийли ўғитлар заводи» унитар корхонаси бош муҳандиси Раҳмат Ўсаровнинг сўзларига кўра, 2014 йили хитойлик мутахассислар иштирокида қайта ишлаш мажмуасининг иккинчи навбати қурилиши ниҳоясига етказилди ва бунинг самарасида ишлаб чиқариш ҳажми ошиб, янги иш ўринлари яратилди.
Айни пайтда Россиянинг «ЗУМК-Инжиниринг» компанияси билан ҳамкорликда йиллик руда қазиб чиқариш қуввати 1 миллион 400 минг тоннага тенг тоғ-кон мажмуаси ҳамда ташқи электр энергия таъминоти объектлари, оралиқ масофанинг узоқлиги (қарийб 30 километр) жиҳатидан дунёда ягона, деб тан олинаётган осма канат йўлининг қурилиши давом эттирилмоқда. Ушбу лойиҳа ҳаётга татбиқ этилгач, калийли ўғитлар ишлаб чиқариш ҳажми йилига 600 минг тоннага, руда қазиб олиш ҳажми эса 2 миллион 100 минг тоннага етади.
Корхонада ўтган беш йил давомида жаҳон стандарти талабларига тўлиқ жавоб берадиган, биринчи навли 900 минг тоннадан ортиқ калий хлорид маҳсулоти ишлаб чиқарилди, унинг 600 минг тоннага яқини хорижга экспорт қилинди. Айни пайтда бу турдаги маҳсулотлар Хитой, Малайзия, Сингапур, Бирлашган Араб Амирликлари, Вьетнам, Арманистон, Молдова, Туркия, Ангола, Украина ва бошқа қатор давлатларга экспорт қилинмоқда.
Тоғ-кон мажмуаси шахтасида руда қазиб чиқариш авваллари хорижлик мутахассислар кўмагида бажарилган бўлса, ўтган йилдан бу иш тўлиқ маҳаллий ходимлар томонидан амалга оширилмоқда. Жорий йилнинг январь июль ойларида маҳсулот ишлаб чиқариш бўйича белгиланган кўрсаткичлар ортиғи билан бажарилди. Ишлаб чиқариш жараёнида чиқадиган чиқинди қайта ишланиб, техник мақсадларда фойдаланиладиган туз олиш йўлга қўйилди.
Корхонада ишлаб чиқариш ҳажмини янада кенгайтириш йўлидаги изланишлар давом эттирилмоқда. Келгусида йиллик қуввати 10 минг тонна бўлган гидроокис калий ишлаб чиқариш режалаштирилган.
Изоҳ (0)