«Ўзбеккино» Миллий агентлиги ва Ўзбекистон Республикаси Молия вазирлигининг 2004 йил 16 июндаги қўшма қарори билан тасдиқланган «Йиллик ишлаб чиқариш ҳажмларини шакллантириш, молиялаштириш ҳамда ажратилган маблағлар мақсадли ва самарали сарфланишини назорат қилиш тартиби тўғрисидаги Низом»га ўзгартиришлар киритилди. Ўзгартиришлар Низомнинг 3-бўлимига тааллуқли бўлиб, белгиланган ишлаб чиқариш ҳажмларини молиялаштириш тартибини белгилайди, деб хабар беради «Ўзбеккино» матбуот хизмати.
Жумладан, Низомнинг эски таҳрирдаги 14-бандига кўра, фильмларнинг белгиланган йиллик ишлаб чиқариш ҳажмларини молиялаштириш уларнинг тематик режаси ва қисқа аннотацияси, шунингдек, «Ўзбеккино» МАнинг фильмлар прокатидан келиб тушадиган маблағларни ҳисобга олган ҳолда тегишли йил учун Ўзбекистон Республикаси Молия вазирлиги томонидан тасдиқланган смета харажатлари асосида амалга ошириб келинган бўлса, бундан буён «Ўзбеккино» Миллий агентлиги томонидан тегишли йил учун тасдиқланган смета харажатлари асосида давлат бюджети маблағлари ҳисобидан амалга оширилиши белгиланди.
«Ўзбеккино» Миллий агентлиги харажатларнинг алоҳида индексацияси, фильмлар ишлаб чиқаришнинг намунавий сметасини ҳисобга олган ҳолда кино маҳсулотларининг амалдаги харажатлар меъёридан келиб чиқиб, фильмлар ишлаб чиқариш ҳажмларини молиялаштириш прогнозини шакллантириши ва келишиш учун Молия вазирлигига тақдим этилиши назарда тутилган 15-банд ўз кучини йўқотди.
Низомнинг янги таҳрирдаги 19-бандида, «Ўзбеккино» Миллий агентлигининг фильмлар прокати ва ҳомийлар маблағлари ҳисобидан келиб тушадиган фойдаси ҳисобидан – қўшимча фильмлар ишлаб чиқаришга, хорижий фильмларни Ўзбекистон Республикаси ҳудудида намойиш этишга, шунингдек, Республика ҳудудида кинофестиваллар ўтказиш ҳамда миллий фильмларни халқаро кинофестивалларда қатнашишини таъминлаш учун сарфлашга йўналтириши мумкинлиги қўшимча равишда киритилди.
Ҳар бир фильмни белгиланган ҳажмда ва муддатларда ишлаб чиқариш якуни бўйича бюджет маблағларини ва фильмлар прокати ҳисобидан келиб тушадиган фойдани мақсадли ишлатилишини назорат қилиш мақсадида, «Ўзбеккино» Миллий агентлиги томонидан ҳар бир фильмнинг ишлаб чиқариш ҳисоботини Молия вазирлигига келишиш учун тақдим қилиниши тўғрисидаги 22-банд ҳам ўз кучини йўқотди.
Эндиликда фильмлар ишлаб чиқариш учун ажратилган бюджет маблағларининг мақсадли ишлатилиши учун барча масъулият ва жавобгарлик «Ўзбеккино» Миллий агентлиги зиммасида бўлади.
Изоҳ (0)