2015 йил 15 август куни Ўзбекистон Миллий кутубхонасида Ўзбекистон халқ артисти Турсунхон Жаъфарова таваллудининг 100 йиллигига бағишланган «Истеъдодли театр ва кино актрисаси» мавзусида адабиётларнинг очиқ кўргазмаси очилди. Бу ҳақда Ўзбекистон Миллий кутубхонаси расмий сайти хабар бермоқда.
Турсунхон Жаъфарова 1915 йилда Наманганда таваллуд топган. 1931—1940 йилларда у Наманган вилоят мусиқали драма ва комедия театрида, 1941 йилдан эса Муқимий театрида ишлаган.
Унинг ижодида кучли драматизм, аниқ саҳна ҳаракатлари, қаҳрамонларининг ҳиссиётларини ёрқин талқин эта олиш қобилияти ифодаланган. Ундаги аёллик назокати-ю, фикр-мулоҳазасининг теранлиги унга томошабинлар ёдида узоқ сақланиб қоладиган роллар ижро этишига кўмаклашади. Театрда «Ҳалима» спектаклидаги Ҳалима, «Лайли ва Мажнун» спектаклидаги Лайли, «Гулсара» спектаклидаги Гулсара, «Тошболта ошиқ» спектаклидаги Рисолат, «Нодира» спектаклидаги Нодира роллари каби Турсунхон Жаъфарова кинода ҳам томошабинларга манзур кўплаб образларни гавдалантирган. Бу «Ўн уч терак кўчаси» фильмидаги она, «Шашмақом» ва «Бувимни қайтаринг» фильмларидаги буви, «Келинлар қўзғолони» фильмидаги Фармонбиби ва бошқалардир.
Кўргазмада иқтидорли актриса ижод йўли ҳақида ҳикоя қилувчи, театршунослар, актрисанинг замондошлари ва шогирдлари хотиралари жамланган «Саҳнам ва саҳнадошларим», «Театр саҳнасидаги ўзбек драматургияси», «Саҳна ва замон» китоблари, Ўзбекистон халқ артисти Турсунхон Жаъфарова санъат йўли ҳақидаги мақолалар чоп этилган «Театр» журнали сонлари ҳамда актрисанинг ҳаёти ва маҳорати акс эттирилган фотосуратлар тақдим этилган.
Изоҳ (0)