Ўзбекистон миллий терма жамоаси бош мураббийи Самвел Бабаян Жаҳон чемпионати—2018 иккинчи саралаш босқичи доирасидаги Яман ҳамда Филиппин терма жамоаларига қарши ўйинлар учун 30 футболчидан иборат кенгайтирилган таркибни эълон қилди. Бу ҳақда Ўзбекистон футбол федерацияси матбуот хизмати хабар бермоқда.
Таркибга миллий терма жамоа сафида 83 та ўйин ўтказган Александр Гейнрихнинг мамлакатнинг асосий жамоаси сафига яна чақирув олгани эътиборга молик.
Самвел Бабаян терма жамоага бош мураббий қилиб тайинланганидан кейин ташкил этилган июль ойидаги йиғиндан фарқли ўлароқ, бу сафар хорижда фаолият олиб бораётган футболчилар ҳам жалб этилган. Шунингдек, аввалги йиғинда иштирок этмаган футболчилардан Игнатий Нестеров, Шавкат Муллажонов ва Санжар Шоаҳмедов ҳам ушбу рўйхатдан ўрин олган.
Эслатиб ўтамиз, Ўзбекистон миллий терма жамоаси Жаҳон ва Осиё чемпионатининг қўшма саралаш босқичи доирасида 3 сентябрь куни Тошкентда Яман терма жамоасини қабул қилади. Бу учрашувдан беш кун ўтиб, Самвел Бабаян шогирдлари сафарда Филиппин терма жамоасига қарши ўйнайди. Бу икки ўйинга тайёргарликни терма жамоа 27 августдан бошлайди.
Дарвозабонлар: Александр Лобанов («Пахтакор»), Игнатий Нестеров («Локомотив»), Элдор Суюнов («Насаф»).
Ҳимоячилар: Александр Мерзляков («Пахтакор»), Даврон Ҳошимов («Пахтакор»), Егор Кримец («Пахтакор»), Анзур Исмоилов («Чангчун Ятай», Хитой), Ислом Тўхтахўжаев («Локомотив»), Шерзод Аъзамов («Насаф»), Шавкат Муллажонов («Локомотив»), Виталий Денисов («Локомотив», Россия), Фаррух Сайфиев («Насаф»).
Ярим ҳимоячилар: Одилжон Ҳамробеков («Насаф»), Шуҳрат Муҳаммадиев («Насаф»), Одил Аҳмедов («Краснодар», Россия), Сервер Жепаров («Ульсан», Жанубий Корея), Азизбек Ҳайдаров («Аш-Шабоб», БАА), Владимир Козак («Пахтакор»), Фозил Мусаев («Сепаҳон», Эрон), Сардор Рашидов («Ал-Жайиш», Қатар), Санжар Турсунов («Ворскла», Украина), Станислав Андреев («Пахтакор»), Жавоҳир Соҳибов («Пахтакор»), Жасур Ҳасанов-катта («Локомотив»), Санжар Шоаҳмедов («Локомотив»).
Ҳужумчилар: Илҳом Шомуродов («Насаф»), Александр Гейнрих («Ордабаси», Қозоғистон), Темурхўжа Абдухолиқов («Локомотив»), Игорь Сергеев («Пахтакор»), Элдор Шомуродов («Бунёдкор»).
Изоҳ (0)