Шимолий Корея, агар унинг чегаралари яқинида халқаро ҳарбий машғулотлар бошланадиган бўлса, АҚШга қарши ноанъанавий жавоб чораларини кўриш билан таҳдид қилди. CNN’нинг 16 август, якшанба куни тарқатган хабарига кўра, расмий Пхеньян АҚШга мисли кўрилмаган қурол билан жавоб беришга ваъда берган.
«КХДР армияси ва халқи АҚШнинг ядровий қуролига ортиқ милтиқ билан қарши чиқмайди. Йўқ, бу армия ва халқ мағлуб бўлмайди, у жаҳонга маълум бўлмаган ҳужум ва мудофаа қуроллари билан таъминланган», — деди КХДР Миллий мудофаа қўмитаси расмий вакили.
Хусусан, Шимолий Корея давлат телевидениеси бошловчиси агар «АҚШ қитъа хавфсизлик остида бўлишини истаса, ҳарбий машғулотларни зудлик билан тўхтатиши кераклигини» маълум қилди.
Жанубий Корея 17 август куни АҚШ ва бошқа иттифоқчилар билан ҳамкорликда анъанавий ҳарбий машғулотларни бошлашни режалаштирган. Пхеньян эса ҳар йили шундай машғулотлар арафасида таҳдид қилиб келади. «Машғулотлар шаффоф, улар мудофаа мақсадларига ҳамда Жанубий Корея ва минтақанинг жанговар тайёргарлигини оширишга йўналтирилган», — дейди АҚШ Давлат департаментининг исми ошкор этилмаган амалдори.
Изоҳ (0)