Экипажнинг беш аъзосидан тўрт нафари алкоголь тестидан ўта олмагани сабаб, AirBaltic авиакомпаниясининг Ослодан Крит оролига парвоз қилувчи рейси қарийб беш соатга кечикди. Бу ҳақда Meduza хабар бермоқда.
Учувчи, иккинчи учувчи ва икки стюардесса полиция ҳамроҳлигида маҳаллий касалхоналардан бирига олиб келинган ва қон таркибида алкоголь миқдорини аниқлаш бўйича тестдан ўтказилган. Тест натижалари ҳозирча маълум қилинмаяпти.
Осло полицияси вакили Эдит Эк Серенсеннинг маълум қилишича, ҳуқуқни муҳофаза қилиш органлари AirBaltic экипажи алкоголли ичимлик таъсирида бўлиши мумкинлиги ҳақида исми ошкор этилмаган (аноним) манбадан ахборот олган.
Агар самолёт экипажи маст ҳолатда рейсни амалга ошириш ниятида бўлгани ҳақидаги гумонлар тасдиқланса, учувчилар ва стюардессалар икки йилгача озодликдан маҳрум этилиши мумкин.
AirBaltic авиакомпанияси мурожаат билан чиқиш қилиб, мазкур ҳодиса юзасидан изчил суриштирув ўтказишга ваъда берган ва рейс кечиккани учун йўловчилардан кечирим сўраган. Хизмат текшируви давомида алкоголь тестидан ўта олмаган экипаж аъзолари ишдан вақтинча четлатилади.
Маҳаллий ОАВ маълумотларига кўра, беш соатга кечиккан самолётда 109 йўловчи Ослодан Критга учиши керак эди.
Изоҳ (0)