Британиялик Тайсон Фьюрининг баланд бўйи супер оғир вазндаги учта йўналиш бўйича жаҳон чемпиони украиналик Владимир Кличкога бўлажак жангда муаммо яратиши мумкин. WBA версияси бўйича «мунтазам» жаҳон чемпионлиги камари соҳиби ўзбекистонлик Руслан Чагаев айнан шундай фикрда, деб хабар қилади «ТАСС».
Кличко ва Фьюри ўртасидаги жанг 24 октябрь куни Дюссельдорфда бўлиб ўтади.
«Супероғир вазнда ҳамма нарса бўлиши мумкин. Фьюри анча баланд (2 метр 6 сантиметр — изоҳ. «ТАСС») ва унинг жисмоний томондан ўзига яраша кучли томонлари бор, бу эса Кличкога баъзи ноқулайликларни яратиши мумкин. Қўшимчасига унинг услуби ҳам ноодатий. Аммо шуларга қарамай, Кличко жангда ғалаба қозонади, деб ўйлайман», — дейди Руслан Чагаев.
Эслатиб ўтамиз, профессионал бокснинг супер оғир вазн тоифаси WBA (Regular) йўналишида жаҳон чемпионлик камарини ўзида сақлаб келаётган Руслан Чагаев 11 июль куни ўзига тегишли бўлган титулни муносиб тарзда ҳимоя қилганди.
Изоҳ (0)