Филиппин полицияси 59 кишининг ҳаётига зомин бўлган паром ҳалокати иши бўйича кема экипажи ва эгасига нисбатан қотиллик айбловини илгари сурди. Бу ҳақда «ТАСС» хабар бермоқда.
Соҳил қўриқлаш хизмати умумий ҳисобда 140 кишини қутқариб қолди. Айни вақтда, паромнинг йўналиш ҳужжатларида 189 киши – 173 нафар йўловчи ва 14 нафар экипаж аъзоси қайд этилган.
Шу муносабат билан Ормок шаҳрида ташкил этилган фавқулодда штаб бошлиғи барча рўйхатларни яна бир бор қайтадан текшириб чиқиш ҳақида кўрсатма берди.
ОАВ маълумотларига кўра, мазкур айбловнинг эълон қилиниши кема ҳалокатига инсон омили сабаб бўлганини билвосита тасдиқлаши мумкин. Бошқа тахминларга кўра, кема ноқулай об-ҳаво шароити туфайли чўкиб кетган бўлиши мумкин.
Лейте вилоятидаги Ормок портидан Камотес оролларидаги Пилар порти томон йўлга чиққан Kim Nirvana пароми 2 июль, пайшанба куни чўкиб кетган эди.
Изоҳ (0)