Ховос тумани, Карвонсарой маҳалласи, Гулзор кўчаси, 41-уйда истиқомат қилувчи, тумандаги 12-умумтаълим мактаби ўқитувчиси Муҳайё Мирзалиеванинг оила аъзолари эски уйларини бузаётиб, пол тахтаси тагини кавлаганларида антиқа топилмага дуч келди. Бу ҳақда Сирдарё вилояти ҳокимлиги расмий сайтига таяниб, «UZ24» хабар қилмоқда.
У ердан қандайдир ҳайвоннинг суяк қолдиқлари чиқди. М.Мирзалиева география фани ўқитувчиси бўлгани боис, бу суякларнинг одатдаги ҳайвон суякларига ўхшамаслигини пайқади ва уларни вилоят ўлкашунослик музейига келтирди.
Музей ходимлари кутубхонадан шу соҳага оид китобларни олиб келиб, динозаврлар оиласига мансуб ҳайвонларнинг скелетларига қараб, суякларни реставрация қилиб мутахассисларни таклиф қилди.
Таниқли олим Боймирза Ўроқовнинг маълумот беришича, геологик эралар – архей, протеразой, полеозой, мезазой, кайназой саналади. Мезазой эрасининг Триас даврида яшаш учун кураш, табиий танлаш ва ирсий ўзгарувчанлик туфайли танаси каламушдек келадиган сут эмизувчилар тухум қўйиб, кўпайган. Мезазой эрасининг Юра даврига келиб, 20—25 метр келадиган ўтхўр сут эмизувчилар пайдо бўлган ва улар динозаврлар деб аталганлиги манбаларда қайд этилган.
«Бу топилмани мезазой эрасига тегишли бўлган сут эмизувчи ҳайвонга тегишли скелет дейишга асос бор. Демак, юзлаб миллион йиллар аввал вилоят ҳудудида мана шундай ҳайвонлар яшаган», — деди олим.
Бу ҳайвоннинг суяклари сақланиб қолганига сабаб эса табиий шароит мавжуд бўлгани, яъни ҳар томонлама қулай ва қуруқ жой бўлгани тахмин қилинмоқда.
Мазкур қимматли топилмага аниқлик киритиш учун археолог олимларни таклиф этиш режалаштирилган.
Изоҳ (0)