«Юра даври олами» фильми жаҳон прокатидаги биринчи ҳафтада 511 миллион доллар ишлади

«Юра даври олами» («Jurassic World») фильми тўлиқсиз бир ҳафтадаги кассабоплиги бўйича жаҳон рекордини ўрнатди. ТАСС хабарига кўра, дастлабки намойиши ўтган чоршанба куни бошланган фильм 15 июнь, душанба кунига қадар жаҳон прокатида 511,8 миллион доллар тўплашга муваффақ бўлган.

Шундай қилиб, фильм кинематография тарихида биринчи ҳафтанинг ўзида ярим миллиард доллар тўплаган илк картинага айланди. Бунгача бу борадаги рекорд 2011 йилда экранларга чиққан «Гарри Поттер ва Ўлим туҳфалари. 2-қисм» фильмига тегишли эди – ўшанда бу фильм бир ҳафтада 483,2 миллион доллар тўплаганди.

Америкалик режиссёр Колин Треворроу томонидан суратга олинган «Юра даври олами» фильми намойиши бир қатор давлатларда чоршанба куни, АҚШда эса пайшанба оқшомида бошланганди ва ҳозирги вақтда 68 мамлакат кинотеатрларида намойиш этилмоқда.

15 июнь, душанба кунига келиб фильм АҚШда 204,8 миллион, Хитойда 100 миллион, Буюк Британияда 29,6 миллион, Мексикада 16,2 миллион, Жанубий Кореяда 14,4 миллион, Францияда 12,5 миллион, Австралияда 12,1 миллион, Германияда 11 миллион доллар тўплашга муваффақ бўлди. Фильмни суратга олиш учун 150 миллион доллар сарфланган.

Бу «Юра даври хиёбони» сериалининг тўртинчи қисми ҳисобланади. Сериалнинг дастлабки фильми 1993 йили машҳур режиссёр Стивен Спилберг томонидан суратга олинган. Ҳозирги кунга қадар «Юра даври хиёбони» сериали умумий 2 миллиард доллардан ортиқ пул ишлаган.