Ўзбекистонлик сейсмологларнинг таъкидлашларича, Непалдаги зилзила Ўзбекистондаги сейсмик вазиятга таъсир қилмайди. Бу ҳақда UZ24 хабар бермоқда.
Ўзбекистон Фанлар академияси Сейсмология институти директори ўринбосари А. Мавлоновнинг маълум қилишича, кузатувлар яқин вақтларда Ўзбекистон ҳудудида кучли зилзилалар рўй бериши мумкинлигини кўрсатмаяпти. Олимлар Ўзбекистон ва яқин ҳудудлардаги сейсмик фаолликни мунтазам кузатиб боришмоқда.
Айни вақтда Қирғизистон Сейсмология институти директори Канатбек Абдрахматов Непалдаги зилзила Марказий Осиёда, жумладан, Қирғизистонда ерости силкинишларига сабаб бўлиши мумкинлигини айтиб ўтди. Унинг сўзларига кўра, Иссиқкўл жойлашган Қирғизистоннинг шимоли-шарқи зилзилалар марказига айланиши мумкин.
Эслатиб ўтамиз, 25 апрель, шанба куни Непалда магнитудаси 7,9га тенг бўлган зилзила юз берганди. Зилзила эпицентри мамлакат пойтахти Катманду шаҳри яқинида бўлган. Маълумотларга кўра, ҳодиса натижасида 5 мингдан ортиқ одам ҳалок бўлган.