Владимир Путин Туркия президенти Ражаб Тоййиб Эрдўғон Россия етакчисининг арманлар геноциди ҳақида айтган гапларига қандай муносабат билдирганидан хабар топди, деб ёзади «Nur.kz» давлат раҳбари матбуот котиби Дмитрий Песковга таяниб.
Журналистлар Эрдўғоннинг сўзлари Россия-Туркия муносабатларига таъсир қилиши ва «Туркия оқими» лойиҳасига салбий таъсир ўтказиши мумкинлиги ҳақида қизиқди.
«Йўқ, биз аввал ҳам кўпқиррали ҳамкорлигимиз ривожланса, ўзимизга ҳам фойда эканлигини кўп бора айтганмиз. Бу ҳолатда алоқаларимиз шу вақтгача ривожланиб келгани каби олдинга силжишда давом этишига умид қилиб қоламиз», — дея жавоб берди Песков.
27 апрель куни Ражаб Тоййиб Эрдўғон Россия 1915 йилдаги воқеаларни геноцид деб аташ ўрнига, Украина ва Қримдаги хатти-ҳаракатлари учун жавоб бериши кераклигини айтган эди.
«Россия бу борада ‘геноцид’ сўзини биринчи марта ишлатаётгани йўқ. Путиннинг бундай қадамни қўйгани шахсан мени қайғуга солди. Ҳозир Украина ва Қримда нималар бўлаётгани аниқ-равшан кўриниб турибди. Улар аввал буни тушунтириб бериши, сўнг ‘геноцид’ сўзини ишлатиши керак эди», — деди давлат раҳбари Анқарадаги матбуот анжуманида.
Изоҳ (0)