Непал ҳукумати 25 апрелда содир бўлган зилзила оқибатида ҳалок бўлганлар хотирасига 28 апрель, сешанба куни уч кунлик мотам эълон қилди, деб хабар беради «РИА Новости».
Зилзила қурбонлари 4353 кишига етди, яна 8000 дан ортиқ одам турли даражада тан жароҳатлари олди.
DPA агентлиги берган маълумотга кўра, Непал ҳукумати имкониятларнинг чекланганлиги сабабли яраланган ва ҳалок бўлганларни қидириш ишлари кутилганидан кўпроқ вақт олишини қайд этган. «Биз бундай катта кўламдаги фалокатга тайёр эмасдик», — деди Непал Ички ишлар вазири Бам Дев Гаутам.
ИИВ вакили яна Синдхупалчок, Расува ва Горкха туманларидаги бир нечта қишлоқларга қутқарувчилар етиб бора олмаётганини ҳам айтиб ўтди.
Эслатиб ўтамиз, 25 апрель куни юз берган 7,9 магнитудали ер қимирлашидан сўнг бир қанча афтершоклар ҳам кузатилди.
Аввал хабар берганимиздек, такрорий зилзилалар туфайли Непал президенти 26 апрелга ўтар кечаси тунни чодирда ўтказди.
Изоҳ (0)