АҚШ ва Сингапур физиклари айни дамда жаҳоннинг энг аниқ ишловчи атом соати деб ҳисобланаётган қурилмани ишлаб чиқишди. Бу ҳақда, Nature Communications журналига асосланиб, Livescience сайти хабар бермоқда.
Янги соатлар 15 миллиард йилда атиги бир сонияга адашиши мумкин – таққослаш учун, олимларнинг ҳисоб-китобларига кўра, астрономик Оламнинг ёши 13,8 миллиард йилга тенг. Янги қурилма хона ҳароратида ишлай олади ва ўзидан аввалги атом соатларидек криоген совутишни талаб қилмайди.
Аввалги рекордчига нисбатан янги соатнинг аниқлик кўрсаткичи уч баробар ошган. Унинг фаолияти стронций атомларининг турли энергетик даражалардаги квант ўтишларига асосланган.
Олимлар янги соатда ҳисоб-китобда хатоларга сабаб бўлиши мумкин бўлган қатор омиллар сонини қисқартиришга муваффақ бўлишди. Биринчидан, қурилмани ташқи элекромагнит нурланиш таъсиридан ҳимоя қилиш мақсадида махсус радиацион ҳимоя билан ўралган. Иккинчидан, платинали термометрлар ёрдамида иссиқлик флуктуацияларининг соат кўрсаткичларига таъсири қўшимча равишда ҳисоблаб чиқилди.
Янги қурилма ёрдамида умумий нисбийлик назарияси (УНН)да тахмин қилинган самара – вақтнинг секинлашишини текшириб кўриш мумкин, деб ҳисобланмоқда.
Изоҳ (0)