Тошкентдаги қиличбозлик бўйича жаҳон чемпионатида Ўзбекистон вакилларининг энг яхши натижаси қайд этилди — 27-ўрин

«Ўзбекистон» спорт саройи ҳамда Бадиий гимнастика бўйича болалар-ўсмирлар республика ихтисослашган олимпия захиралари спорт мактаби мажмуаси мезбонлик қилаётган ўсмирлар (17 ёшгача) ва ёшлар (20 ёшгача) ўртасидаги қиличбозлик бўйича жаҳон чемпионатида навбатдаги ғолиб ва совриндорлар маълум бўлди, дея хабар бермоқда «Olamsport.com».

Кеча, 5 апрель куни ёшлар ўртасидаги мусобақалар ўтказилиб, унда ҳозиргача бўлган энг яхши натижамиз қайд этилди. Ўғил болалар ўртасидаги баҳсларда Жавоҳирбек Нурматов 153 иштирокчи орасида 27-ўринни эгаллади. Темурбек Абдувалиев 49, Абдулбосит Насриддинов эса 83-ўринни банд этди.

Бу йўналишда франциялик Ипполит Боуиллот олтин медални қўлга киритди. Венгриялик Сзомбор Баняиз кумуш, испаниялик Юлен Перейра ва хитойлик Янгдонг Ксюе бронза медали билан тақдирланди.

20 ёшгача бўлган қиз болалар ўртасидаги мусобақада эса америкалик Сара Таффел жаҳон чемпиони бўлди. Канадалик Элеанор Харвей кумуш медаль билан тақдирланган бўлса, германиялик Леони Эберт ҳамда хитойлик Йитинг Фу бронза медали билан уйга қайтадиган бўлишди.

88 нафар иштирокчи қатнашган ушбу мусобақада ҳамюртларимиздан энг яхши натижани Муштарий Абдураззоқова қайд этди. У 75-ўринни эгаллади. Мафтуна Илёсова 77, Мадина Парпиева эса 87-поғона билан кифояланди.