Москва шаҳар суди сиёсатчи Борис Немцов ўлими ҳақидаги иш бўйича айбланаётган учинчи киши — Тамерлан Эскерхановни ҳибсдан озод қилди ва унинг учун жиноят олдини олувчи чоралар тайинлаш ҳақидаги масалани қайтадан кўриб чиқишга юборди. Бу ҳақда «РИА Новости» хабар бермоқда.

«Қарор айбланувчиларнинг ҳимояга бўлган ҳуқуқига риоя қилиш мақсадида қабул қилинди», — деди суд матбуот котиби. Унинг эслатишича, РФ Олий суди пленуми судларга бир ишнинг бир нечта фигурантларига нисбатан жиноят олдини олувчи чоралар белгилашда масалани индивидуал равишда кўриб чиқишни тавсия қилган эди.

Москва шаҳар суди 1 апрель куни аввалроқ Шагит Губашев ва Ҳамзат Бахаевга нисбатан ҳам шунга ўхшаш ҳукмлар чиқарган эди.

Эслатиб ўтамиз, Борис Немцов Москва вақти билан 27 февраль 23:15 да (Тошкент вақти билан 28 февраль 01:15 да) Москва марказидаги Москворецкий кўпригида отиб ўлдирилди.

Ички ишлар вазирлиги расмий вакили сўзларига кўра, Немцов қиз дўсти билан кўприкдан ўтаётган маҳал оқ рангли машинадан унга қарата олтита ўқ отилган. Шулардан тўрттаси мухолифатчига келиб теккан. Қотиллик чоғида сиёсатчининг ёнида бўлган қиз — 23 ёшли украиналик модель Анна Дурицкая ўз кўрсатмаларини бериб, ватанига қайтиб кетди.