Сирғали бозори Ҳожикентга кўчади, мобил операторлар абонент тўловини бекор қилади, Тошкентда Ikea очилади

1 апрель − ҳазил-мутойиба куни муносабати билан Ўзбекистоннинг қатор электрон оммавий ахборот воситалари ҳам ҳазиломуз хабарларни чиқаришга қарор қилди. Эътиборингизга улардан энг шов-шувлиларини ҳавола этамиз.

Сирғали автобозори Ҳожикентга кўчади

«Bibi.uz» сайтининг ҳазиллашишича, Сирғали автомобиль бозори 15 майдан Бўстонлиқ туманидаги «Ҳожикент» темир йўл станцияси яқинига кўчирилади. Бунга сабаб сифатида Сирғали бозорида жой етишмовчилиги, Тошкент−Ҳожикент электропоезди йўловчилари оқимини кўпайтириш ва ҳайдовчиларнинг Сирғали бозори узоқлиги ҳақидаги шикоятлари кабилар кўрсатилган.

Beeline, Ucell ва UMS барча тариф режаларида абонент тўловини бекор қилади

«Mobinfo.uz» сайти Ўзбекистондаги Beeline, UMS ва Ucell мобил алоқа операторлари томонидан 2015 йил 2 апрелдан барча тариф режаларида абонент тўлови бекор қилинишини маълум қилди. Шунингдек, UzMobile ва Perfectum Mobile компаниялари ҳам ушбу акцияларга қўшилишини маълум қилган. Янгилик нега айнан 2 апрелдан киритилиши ҳақидаги саволга агар 1 апрелдан жорий қилинганда кўпчилик буни ҳазил деб ўйлаши мумкинлиги билан жавоб қайтарилган.

Шунингдек, Ucell абонент ҳар сафар қўнғироқ қилиб туша олмаганда унинг ҳисобига 0,01 доллар ўтказиб бериши, Beeline эса 1 Мегабайт интернет тақдим этиши маълум қилинган. Табиийки, хабар охирида нашр ҳаммани 1 апрель билан табриклаган.

Тошкентда IKEA дўкони очилади

Швециянинг уй жиҳозлари ва рўзғор буюмлари савдоси билан шуғулланувчи дунёга машҳур IKEA тармоғи Тошкентда ҳам ўз дўконини очиши ҳақидаги хабарни «Afisha.uz» тарқатди. Нашр хабар охирига «1 апрель ҳуқуқлари асосида» дея изоҳ беришни унутмаган.

Қовун, сомса, манти, кабоб ҳидли атирлар

Facebook’даги «Potrebitel.uz» гуруҳида эса дастлаб Фарғона водийсининг Босволди навли қовуни остида тайёрланган Bosvaldini di Rishtan атирлари Европада сотувга чиқарилгани ҳақидаги хабар пайдо бўлди.

Кейин эса миллий таомларимиздан сомса, манти ва кабоб ҳиди билан ишлаб чиқариладиган атирлар ҳақида хабар берилди.