31 март куни соат 16:00 да Тошкент шаҳридаги Миллий матбуот марказида Ўзбекистон «Адолат» СДП Сиёсий Кенгаши томонидан брифинг ўтказилди. Унда Олий Мажлис Қонунчилик палатаси депутатлари, партия Сиёсий Кенгаши Марказий аппарати масъул ходимлари, фаоллар ва ОАВ вакиллари иштирок этди. Бу ҳақда «Адолат» СДП матбуот хизмати хабар бермоқда.
Брифингда Ўзбекистон «Адолат» СДП Сиёсий Кенгаши раиси Н. Умаровнинг Ўзбекистон Республикаси Президенти сайловида партиянинг иштироки ва унинг дастлабки натижалари хусусида ахбороти тингланди.
Таъкидланганидек, 29 март куни Ўзбекистон фуқаролари яна бир тарихий воқеликнинг бевосита иштирокчиси ва гувоҳи бўлди. Юртдошларимиз Ўзбекистон Республикаси Президентини сайлашдек муҳим сиёсий тадбирда фаол иштирок этиб, ўз конституцион ҳуқуқини амалга оширди.
Президентлик сайлови ташкилий жиҳатдан юқори савияда, миллий ҳамда халқаро қонунчилик меъёрлари ва талабларига тўлиқ риоя этилган ҳолда ўтказилди.
Сайлов куни Ўзбекистон «Адолат» СДПнинг барча сайлов штаблари тўлиқ таркибда фаолият олиб борди. Ҳудудий ва маҳаллий сайлов штабларидан келган ахборот ва маълумотлар партиянинг марказий штабида умумлаштирилиб, таҳлил этиб борилди.
Шунингдек, Республика бўйича партиядан жами 90 мингдан ортиқ кузатувчи овоз бериш жараёнларини кузатиб борди. Сайлов жараёнларида қонунбузилиш ҳолатлари бўйича партия марказий штабига ва ҳудудий штабларга ҳеч қандай шикоят ёки мурожаатлар келиб тушмади.
Бир сўз билан айтганда, сайлов демократик принципларларга тўла мос ҳолда, адолатлилик, очиқлик, ошкоралик ва транспарентлик асосида бўлиб ўтди.
Марказий сайлов комиссияси томонидан эълон қилинган сайловнинг дастлабки натижаларига кўра, Ўзбекистон «Адолат» СДПдан кўрсатилган номзод Н. Умаров сайловчилар умумий овозининг 2,05 фоизини тўплади. Ушбу натижа партия учун қониқарли бўлмаса-да, умуман, мазкур сайлов Ўзбекистон сиёсий майдонида партиянинг ўрнини мустаҳкамлаш, электорати манфаатларини ифодалаш имконини берганлиги билан аҳамиятли бўлди.
Партия раҳбари бундан буён ҳам сайловчиларга берилган ваъдалар устидан чиқишга, «Адолат» СДП сайловолди дастурида белгиланган мақсад-вазифаларни амалиётга татбиқ этишга, электорат манфаатларини қатъий ҳимоя қилишга партиянинг Олий Мажлис Қонунчилик палатаси ҳамда маҳаллий вакиллик органларидаги депутатлик корпуслари ҳамда барча фаолларининг куч ва имкониятлари сафарбар қилинишини қайд этди.
Изоҳ (0)