«Тошкент шаҳридаги 158-сайлов участкасидаги овоз бериш жараёни билан танишдим. Участкалар демократик тамойилларга мос жиҳозлангани, сайловчилар ушбу муҳим сиёсий тадбирда фаол иштирок этаётганига гувоҳ бўлдим, — дея Кеничи Мацумото, Япония тиббиёт ускуналари соҳасида ташқи техник кўмак ташкилоти (ОМЕТА) президенти, «Мацумото» жамғармаси раиси сўзларини келтирмоқда ЎзА. — Айтиш жоизки, демократиянинг барча давлатларда бир хил жорий этилиши лозим бўлган универсал модели йўқ. Ҳар бир тизим муайян халқнинг манфаати, маданияти, анъана ва урф-одатлари, мамлакатнинг жўғрофий-тарихий шароитини ҳисобга олган ҳолда жорий этилса юксак самара беради.
Ўзбекистонда амалга оширилаётган демократик ислоҳотлар, жумладан, сайлов тизими халқаро андозалар ва демократик давлатларнинг илғор тажрибаси, халқнинг анъанавий қадрият ва қарашларини мужассамлаштиргани билан ҳам диққатга сазовордир. Менимча, сайловлар ҳудди Ўзбекистондагидек эркин, адолатли, очиқ ва ошкора, тартибли ва осойишта ўтиши лозим. Зеро, тинчлик ва осойишталик тараққиёт ва фаровонликнинг асоси ҳисобланади.
Бугунги кунда Ўзбекистонда жисмонан чиниққан ва маънан етук авлодни камол топтиришга улкан эътибор қаратилаётгани барчага маълум. Ёшларнинг интеллектуал салоҳиятини юксалтириш, уларни хорижий тилларни ўрганишга жалб қилиш, ўз иқтидорини тўла намоён этиши учун барча шароитни яратиш баробарида ёшлар орасида спорт турларини оммалаштириш борасида амалга оширилаётган кенг кўламли ишлар ҳам таҳсинга лойиқ. Ўзбекистонда эртанги куннинг ҳал қилувчи кучи бўлган ёшларнинг баркамоллиги йўлида олиб борилаётган саъй-ҳаракатларни юксак баҳолайман».
Изоҳ (0)