Жорий йилнинг 25 март куни Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитада Ўзбекистон Республикаси Президенти сайловида кузатувчи бўлиб қатнашиш учун Ўзбекистонга ташриф буюрган АҚШ ва Канада Бухоро яҳудийларининг Конгресси Президенти Борис Кандов билан учрашув бўлиб ўтди. Бу ҳақда Дин ишлари бўйича қўмита расмий сайтида хабар берилди.
Меҳмонга АҚШ ва Канада Бухоро яҳудийлари Конгресси Вице-президенти Н. Юшмаев, Тошкент яҳудийлари жамоаси раввини Б. Абрамчаев ҳамда Тошкент яҳудийлари диний жамоаси раиси А. Исахаров ҳамроҳлик қилди. Меҳмонларни қўмита раиси О.Юсупов қабул қилди.
Учрашув чоғида О. Юсупов Б. Кандов ва Н. Юшмаевни келаётган Ўзбекистон Республикаси Президенти сайловида кузатувчи бўлиб Ўзбекистонга қилган ташрифи билан қутлар экан, уларга муваффақиятлар тилади. Сўнг меҳмонларни Ўзбекистонда диний вазият ҳамда дин соҳасида олиб борилаётган ислоҳотлар билан таништириб ўтди.
Б. Кандов ҳам, ўз навбатида, АҚШ ва Канада Бухоро яҳудийлари Конгрессининг тарихи, бугунги фаолияти тўғрисида батафсил сўзлаб берди. Шунингдек, уларнинг ҳар бир Бухоро яҳудий вакили учун Ватан ҳисобланмиш Ўзбекистон заминига яна бир бор ташриф қилганидан самимий хурсандлиги билан ўртоқлашди.
Н. Юшмаев ҳам ўз томонидан Ўзбекистон бугунги кунда бошқа давлатлар учун диний ва миллий бағрикенглик соҳасида олиб бораётган изчил йўли билан намуна бўла олишини таъкидлаб ўтди. Меҳмонлар Ўзбекистондаги динлараро бағрикенглик ва миллатлараро тотувликка баҳо бермоқчи бўлган ҳар қандай инсон, албатта, шу заминга ташриф буюриши даркорлигини қайд этди.
Суҳбат давомида икки томон келгусида шундай дўстона муносабатларни давом эттириш лозим эканини таъкидлади.
Учрашув давомида О. Юсупов меҳмонларга Ўзбекистонда диний ва миллий бағрикенглик тўғрисида ўзбек, рус ва инглиз тилларида сўзлаб берувчи «Ўзбекистон – бағрикенг диёр» номли китобни тақдим этди.
Суҳбат самимий ва дўстона руҳда ўтди.
Изоҳ (0)