Germanwings авиакомпаниясининг Airbus А320 лайнери учувчиларидан бири авиаҳалокатдан аввал кабинани тарк этгани маълум бўлди, дея хабар бермоқда Meduza терговда қатнашаётган ҳарбийлардан бирига таяниб. Унинг сўзларига кўра, «қора қути»дан олинган ёзувда учувчи қайтадан кабинага кирмоқчи бўлгани, бироқ буни уддалай олмаганини эшитиш мумкин.
Манбанинг таъкидлашича, учувчи дастлаб эшикни секин тақиллатган, сўнг қаттиқроқ урган, шундан кейин эса эшикни уриб синдирмоқчи бўлган, бироқ уддалай олмаган. Охир-оқибат у кабинага кира олмаган.
Нашр қайд этишича, «қора қути» ёзуви авиаҳалокатнинг баъзи тафсилотларини очиб беради, бироқ самолёт нима учун қулагани ва қулаш жараёни саккиз дақиқа давом этган бўлса-да, нима сабабдан учувчилар ҳалокат сигналини юбора олмагани тўғрисидаги саволларга жавоб бермайди.
Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Альп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.
Изоҳ (0)