Ўтган ҳафта мобайнида Ўзбекистон ҳудудида 203 та ёнғин қайд этилган, деб хабар бермоқда Ўзбекистон Республикаси Ички ишлар вазирлиги матбуот хизмати.
Турли сабабларга кўра содир бўлган ёнғинларда 3 нафар фуқаро тан жароҳатлари олишган ва 2 нафар фуқаро ҳалок бўлган. Ушбу ёнғинларда 982 миллион сўмдан ортиқ қурилиш материаллари ва 1 миллиард 60 миллион сўмга яқин моддий бойликлар ёнғиндан сақлаб қолинган.
Тошкент шаҳар Яшнобод туманида яшовчи фуқаронинг уйида электр симларининг қисқа туташуви натижасида ёнғин содир бўлган. Ёнғин натижасида уйнинг 40 квадрат метр майдонда томи, шифт қисми ва уй жиҳозлари ёниб зарарланган.
Тошкент вилояти Олмалиқ шаҳрида яшаган фуқаро уйида маст ҳолда сигарета чекиб ухлаб қолиши натижасида сигарета чўғидан ёнғин содир бўлган. Ёнғин оқибатида 2 квадрат метр майдонда уй жиҳозлар ёниб зарарланган ва уй эгаси тутундан димиқиб ҳалок бўлган.
Сурхондарё вилояти Сариосиё туманида яшовчи фуқаронинг хонадонида ёнғин хавфсизлиги талабларига зид равишда электр иситиш мосламаси устига матоларни қуритиш учун илиб қўйиб, назоратсиз қолдирилиши оқибатида матоларнинг тутаб ёнишидан ушбу хонадонда ухлаб ётган уй эгасининг 2 ёшли қизи тутундан димиқиб ҳалок бўлган.
Изоҳ (0)