Темурийлар тарихи давлат музейида Зулфия таваллудининг 100 йиллигига бағишланган анжуман бўлиб ўтди

Тошкент шаҳридаги Темурийлар тарихи давлат музейида Ўзбекистон халқ шоири Зулфия таваллудининг 100 йиллигига бағишланган илмий-амалий анжуман бўлиб ўтди, деб хабар беради «Халқ сўзи» нашри.

«Мустақиллик даври адабиётида Зулфия ижодининг аҳамияти» мавзуидаги мазкур тадбирда адабиёцҳунос олимлар, республикадаги олий ўқув юртлари профессор-ўқитувчилари, шоир ва ёзувчилар, шеърият ихлосмандлари, шунингдек, Зулфия номидаги Давлат мукофоти совриндорлари иштирок этди.

Анжуманда сўзга чиққан ЎзФА вице-президенти Б. Абдуҳалимов, Ўзбекистон ёзувчилар уюшмаси раиси Муҳаммад Али ва бошқалар мамлакатда маънавиятга, адабиётга қаратилаётган эътибор кўплаб иқтидорли ёшларнинг етишиб чиқишига, ўзбек адабиёти ва санъатининг жаҳон саҳналарида баралла янграшига хизмат қилаётганини алоҳида таъкидлади.

Давлат раҳбарининг «Ўзбекистон халқ шоири Зулфия таваллудининг 100 йиллигини нишонлаш тўғрисида»ги қарорига мувофиқ, айни пайтда шоира ҳаёти ва ижоди ҳақида ҳикоя қилувчи бир қатор китоблар нашр этилди. «Сайланма», «Зулфия замондошлари хотирасида» тўплами, қорақалпоқ тилидаги «Мушоира», «Сени куйлайман, ҳаёт» асарлари шулар жумласидандир. Қолаверса, Зулфиянинг энг сара асарларини жамлаган «Мен ишқ эдим» деб номланган китоб инглиз тилида чоп қилишга тайёрланмоқда.

Анжуман доирасида Зулфия асарлари кўргазмаси ҳам намойиш этилди.