Таиландда ўтказилаётган Осиё чемпионатида ўзбекистонлик Тимур Гумеров омиум (кўпкураш) баҳсларида марра чизиғига биринчи бўлиб етиб келди ва қитъа чемпионатининг олтин медали билан бирга 2016 йили Рио-де-Жанейро шаҳри (Бразилия)да ўтказиладиган ХXXI ёзги Олимпиада ўйинларининг йўлланмаси учун муҳим очколарни қўлга киритди, деб хабар бермоқда Ўзбекистон Миллий олимпия қўмитаси матбуот хизмати.
Мазкур мусобақада иккинчи ўринни Жанубий Корея терма жамоаси аъзоси эгаллаган бўлса, учинчи ўрин қозоғистонлик спортчига насиб этди.
Ёшлар ўртасида ўтказилаётган мусобақаларда Ўзбекистон шарафини ҳимоя қилаётган Дилмуржон Сиддиқов ҳам бронза медалини қўлга киритиб, совриндорлар сафидан ўрин эгаллади.
Осиё чемпионати баҳслари 14 февралга қадар давом этади.
Изоҳ (0)