Таиланд полициячилари қироллик оиласини ҳақорат қилгани учун судланди

Таиланд полициясининг икки нафар генерали олти йилга озодликдан маҳрум этилди, дея хабар бермоқда «Российская газета».

Марказий тергов бюроси собиқ раҳбари Таиланд полицияси генерал-лейтенанти Пхонгпхат Чаяпхан ва унинг собиқ ўринбосари генерал майор Ковит Вонгрунгротга нисбатан учта жиноий иш қўзғатилди. 30 январь куни уларнинг биринчисига ҳукм чиқарилди. Шунингдек, юқори лавозимдаги полициячилар қўли остида ишлайдиган тўрт киши судланди.

Генераллар ва уларнинг қўли остидагилар яширин казино очиб, у ерда соқчилик вазифасини бажарганликда айбланди. Бундан ташқари, улар казинода бўлган вақтида қироллик оиласи аъзоларидан бирининг вензели (исм ва фамилия бош ҳарфларини бир-бирига чирмаштириб тузилган безак)ни  ва Таиланд меросхўр шаҳзодасининг гўдак ёшидаги ўғли портретидан иборат белгини тақиб юрган. Шу тариқа, терговчилар фикрича, улар гўёки казино ва қироллик саройи ўртасида алоқа борлигини кўрсатган.

Натижада полициячилар «олий жанобларини ҳақорат қилиш» ва «яширин казино ташкил этиш» моддалари бўйича судланди.