Саудия Арабистони қироллигининг олтинчи қироли Абдулла ибн Абдул Азиз Ал Сауд 23 январь куни, жума тонгида 91 ёшида бу дунёни тарк этди. Бу ҳақда «Kun.uz» хабар қилмоқда.
Ўтган ойда қирол пневмония хасталиги туфайли пойтахт Ар Риёд шаҳридаги марказий шифохонага ётқизилган, шу ой бошида унда «ўпка инфекцияси» аниқланган ва унинг яшаши учун ўпкасига махсус трубка орқали ҳаво юборишга тўғри келаётган эди. Марҳум қирол сўнгги 4 йил давомида соғлигидаги муаммолар билан курашиб яшади. Унинг дафн маросими Макка шаҳрида эмас, Ар Риёдда, бугун пешин маҳалида ўтказилади.
Маълумот учун, ушбу марҳум қирол ўлимига қадар дунёнинг энг ёши улуғ ҳукмдори ҳисобланар эди. У саудлар қироллиги асосчиси Абдул-Азиз II нинг ўғли эди. Отаси қирол бўлган вақтда у Макка шаҳри ҳокими бўлган ва миллий гвардияни бошқарган. Шунингдек, бу вазифалари билан бир вақтда мамлакатнинг бош вазири ҳам ҳисобланган.
Унинг отаси 1982 йилда оламдан ўтиб, тахтга катта ўғил Фахд чиқади ва Абдулла валиаҳд шаҳзодага айланади. 2005 йилда Фахд ҳам вафот этгач, Абдулла расман қиролга айланади, лекин у амалда 1995 йилда акасининг соғлиги ёмонлашганидан буён қиролликнинг бошқара бошлайди.
У ўзининг демократик қарашлари билан бошқа қироллардан ажралиб турар эди. Айнан унинг қарори билан қироллик хонадони аъзолари фуқароларни қатлга буюриш ваколатидан маҳрум қилинган эди (Саудияда қироллик хонадони аъзолари 7000 нафардан ошади). Шунигдек, унинг даврида қиролнинг қўлини ўпиш мажбурияти ҳам бекор қилинган.
Эндиликда, унинг бўшаган тахтига 2012 йилнинг 18 июнида валиаҳд шаҳзода этиб тайинланган 79 ёшли Салмон ибн Абдул-Азиз Сауд чиқади. Унгача тахт ворислари бўлган икки шаҳзода ҳам қиролдан олдин вафот этгани учун, у учинчи валиаҳдага айланган эди. У бу вақтгача Саудия Арабистони Мудофаа вазири бўлиб ишлаган. Унинг ўғли шаҳзода Султон эса, ҳарбий учувчи ва Саудиядан фазога чиққан илк араб астронавти ҳисобланади. Янги қиролнинг тахт вориси эса, шаҳзода Муқрин бўлади.
Изоҳ (0)