Сурхондарёда асаларичилик субъектлари сони 6 йил ичида 536 тага етди
Сурхондарё вилоятида асаларичиликни ривожлантириш, ҳар томонлама қўллаб-қувватлашга алоҳида эътибор қаратилмоқда, деб хабар берди ЎзА.
2008 йили вилоятда 60 асаларичилик субъекти фаолият кўрсатган бўлса, 2014 йилда уларнинг сони 536 тага етгани ҳам фикримиз тасдиғидир. Соғлом бола йилида вилоят асаларичилари томонидан 500 тоннадан ортиқ табиий, шифобахш ва арзон асал маҳсулоти етиштирилди.
Вилоят марказий ўрмон хўжалигидан олинган маълумотларга кўра, тармоқни қўллаб-қувватлаш, ички бозорни арзон, сифатли маҳсулот билан таъминлашга қаратилаётган алоҳида эътибор шифобахш, тўйимли табиий неъмат ишлаб чиқариш кўламини кенгайтиришда ютуқлар омили бўлмоқда. Ўтган йили соҳани молиявий қўллаб-қувватлаш учун тижорат банклари томонидан ажратилган 268 миллион сўм имтиёзли кредит эвазига 4 минг 638 янги асалари оиласи ташкил этилди. Барча тоифадаги асаларичилик хўжаликларида асаларилар сони 32 минг оилага етди.
Айни пайтда асаларичилик хўжаликларига хизмат кўрсатиш тармоқларини ривожлантириш ҳам доимий эътибор марказида бўлиб келмоқда. Бойсун туманида асаларичилар учун иш қуроллари ва бошқа жиҳозлар ишлаб чиқариш ўзлаштирилаётир. Ариларни қиш мавсумидан беталафот олиб чиқиш, имтиёзли нархларда ари озуқаси – шакар етказиб бериш масалалари ўз вақтида ҳал этилмоқда. Бозорларда асаларичиларнинг савдо қилиши учун етарли шароит яратилмоқда. Бойсун, Шеробод ва бошқа туманларда асал билан савдо қиладиган замонавий дўконлар бунёд этилди. Тажрибали мутахассислардан иборат гуруҳ аъзолари асаларичилик субъектлари фаолиятини ўрганиб, амалий ёрдам кўрсатаётир. Улар янги қўлланмалар билан таъминланиб, семинар машғулотлари ўтказилмоқда.
– Асаларичиликнинг ўзига хос гашти бор, – дейди Узун туманидаги «Соф осиё асали» хусусий корхонаси раҳбари Ойбек Сулаймонов. – 160 оила асаларини парваришламоқдамиз. Ўтган йили уч тоннага яқин табиий асал етиштириб, арзон нархларда истеъмолчиларга етказиб бердик. Ҳозир ариларни қиш мавсумидан беталафот олиб чиқиш ҳаракатидамиз. Шу йилдан ишлаб чиқариладиган маҳсулотимизнинг бир қисмини хорижга экспорт қилишни мўлжалламоқдамиз. Тоғ ва тоғолди ҳудудларида қуёш нурига тўйинган турли гуллардан олинган асалнинг шифобахшлиги ва қуввати юқорилиги маҳсулотимиз харидоргирлигини таъминлаётир.
Шифокорларнинг фикрича, асал инсон учун нафақат табиий тўйимли озуқа, балки кўплаб касалликларни даволашда қўлланиладиган ғоят шифобахш неъматдир. Асални меъёрида истеъмол қилиб юриш ошқозон-ичак касалликларининг олдини олади, иммунитетни оширади. Биологик фаол моддаларга жуда бой бу маҳсулот инсоннинг қон босимини меъёрлаштириш хусусиятига ҳам эга. Асалари муми, елими (прополис) ва сути ҳам шифобахш маҳсулот сифатида замонавий тиббиётда кенг қўлланилаётир. Фармацевтикада дори-дармон сифатида ишлаб чиқарилаётган она ари сутида тўрт турдаги V, Е витамини, аминокислоталар мавжуд.
Сурхон воҳаси ари боқиш, кўпайтириш ва маҳсулот етиштириш учун жуда қулай ҳудуд. Айниқса, ғўза, янтоқ каби ўсимлик гуллари табиий глюкозага бойлиги билан ажралиб туради. Шу боис бундай гуллардан олинган асал кўпчиликка маъқул келмоқда.
– Қиш – асаларичилар учун ғоят масъулиятли мавсум, – дейди вилоят асаларичилар уюшмаси раиси Холида Эсонова. – Ариларнинг совуқ кунларни хотиржам ўтказишида кузда варроатоз канасига қарши курашиш ва етарли миқдорда озуқа базасини яратиш муҳим аҳамиятга эга. Буни яхши билган асаларичиларимиз мумкатакларда қишга етарли асал қолдиришни анъанага айлантирган. Арининг қишда қандай озиқланиши мавсумнинг илиқ ёки совуқ келиши билан бевосита боғлиқ. Шу боис ариларнинг қўшимча озуқа базаси яратилаётгани тармоқни янада юксалтиришда муҳим аҳамият касб этмоқда. Президентимиз раҳнамолигида соҳани ривожлантиришга қаратилаётган юксак эътибор аҳолини арзон ва шифобахш маҳсулот билан таъминлашга хизмат қилмоқда.
