Одил Аҳмедов: Осиё кубогида тўрт йил олдинги натижани яхшилашга қодирмиз

InterFutbol газетаси сўровига кўра, Россиянинг «Краснодар» клуби ва миллий терма жамоамиз ярим ҳимоячиси Одил Аҳмедов 2014 йилнинг энг яхши футболчиси, деб топилди. Нуфузли нашр жамоаси Осиё кубоги мусобақасига жўнаб кетиши олдидан Одил билан табриклаш баробарида ундан махсус интервью олди, деб хабар бермоқда «Stadion.uz».

− Одил, суҳбатимиз аввалида сизни газетамиз танловига кўра, 2014 йилнинг энг яхши футболчиси бўлганингиз билан табриклаймиз.

− Раҳмат. Фурсатдан фойдаланиб, мен ҳам юртдошларимизни янги йил билан қутлайман ва уларга омад, бахт, муваффақият тилайман. Шунингдек, мени энг яхши сифатида танлашгани учун InterFutbol газетаси ходимларига миннатдорчилик билдираман. Футболчи учун ҳар қандай эътироф ўзгача таъсир этади. Меҳнатимнинг тан олиниши менга қўшимча куч беради, масъулиятни оширади. Энди овоз берганлар ишончини оқлаш учун янада яхшироқ ўйин намойиш этишга ҳаракат қилишим тайин.

− Шахсий фикрингизча, мамлакатимизнинг 2014 йилги энг яхши мураббийи ва футболчиси мақомига кимлар муносиб?

− Мураббийлардан «Пахтакор» устози Самвел Бабаянни эътироф этаман. Зеро, Самвел Вячэславович асосан ёшлардан иборат ва юлдузларга эга бўлмаган жамоа билан чемпион­ликка эришди. Футболчиларга келсак, энг яхши бўлишга муносиб ўйинчилар кўп ва кимнидир ажратиб кўрсатолмайман.

− 2014 йилни қандай таассуротлар билан кузатдингиз?

− Таъкидлаш жоиз, йил мен учун омадли келди. Мана, «Краснодар» таркибида Европа Лигаси баҳсларида кучли жамоаларга қарши майдонга тушиб, маҳоратимни оширдим. Тўғри, Европа Лигасида клубимиз гуруҳдан чиқолмади. Асосийси, «Краснодар» еврокубоклардаги дебют мавсумида чакки таассурот қолдирмади. Шунинг­дек, Россия прем­ер-лигасида ҳам жамоамиз яхши ўйинлар намойиш этиб, қишки танаффусга 4-ўринда чиқиб кетди.

− Россия премьер-лигаси доирасида ЦСКАга қарши кечган баҳсда жароҳатлангандингиз. Ўша жароҳат безовта қилмаяптими? Саноқли кунлардан сўнг Австралияда старт оладиган Осиё кубоги ўйинларига шаймисиз?

− Футболчи учун энг катта душман − жароҳат. Худога шукр, жароҳатдан фориғ бўлдим. БААдаги йиғинда ироқликларга қарши иккинчи ўртоқлик учрашувида майдонга тушишга ҳам улгурдим. Осиё чемпионати баҳслари бошланишига яна маълум вақт бор. Ўйлайманки, стартгача оптимал формага кираман.

− 2011 йили Қатарда ўтказилган Осиё кубогида жамоамиз 4-ўринни эгаллаганди. Бу сафар ўша натижани яхшилаш ёки лоақал такрорлаш имконияти борми?

− Айни пайтдаги термамиз 4 йил олдинги натижани яхшилашга қодир. Зеро, таркибимиздан энг кучли футболчилар ўрин олишган. Барчамиз қўлимиздан келганича ишқибозлар ишончини оқлаб, мазмунли ўйин намойиш этиш ва ижобий натижага эришишга интиламиз.

− Саноқли кунлардан сўнг жаҳоннинг 2014 йилги энг яхши мураббийи ва футболчиси аниқланади. Шахсан сиз кимларни эътироф этасиз?

− Менимча, сайёрамизнинг энг яхши мураббийи − Германия терма жамоаси устози Йоахим Лёв, энг яхши футболчиси эса − Криштиану Роналду. Улар учун 2014 йил жуда омадли келди.