Сельдь балиғи билан байрамона «Шуба» салатини тайёрлаймиз

«Дарё» нашрининг Korzinka.uz супермаркетлар тармоғи билан ҳамкорликдаги Янги йилга бағишланган лойиҳаси доирасида байрам дастурхонига тортиш мумкин бўлган таомлар рецептини тақдим этиб боришда давом этамиз.

Бугунги таомномада — сельдь балиғи қўшилган «Шуба» салати

Ушбу салатни тайёрлаш учун тахминан 30 дақиқа вақт ва 14 187 сўм талаб этилади.

Зарур масаллиқлар:

• 1 та тузланган сельдь балиғи (тахминан 700 г)
• 200 г картошка
• 200 г қизил лавлаги
• 200 г қизил сабзи
• 4 та тухум
• 100 г пиёз
• 200 г майонез
• туз
• мурч

Тайёрланиши:

1. 200 граммдан картошка, қизил лавлаги, қизил сабзи ва 4 та тухумни яхшилаб ювиб, пўсти билан қайнатиб пишириб оламиз. Сўнг уларни пўстидан тозалаймиз.

2. Селёдканинг боши ва думини олиб ташлаймиз, қилтиғидан тозалаймиз.

3. Сабзавот ва тухумларни йирик тишли қирғичдан ўтказиб оламиз.

4. Балиқни майда қилиб тўғраймиз.

5. Пиёзни арчиб, уни ҳам майдалаймиз.

6. Ликопча олиб, унга махсус қолипни қўямиз.

7. Қолипга масаллиқларни устма-уст қўйиб чиқамиз, ҳар бирининг орасига майонез сурамиз ҳамда таъбга кўра туз ва мурч қўшамиз. Дастлаб селёдкани бир қават қилиб соламиз.

8. Устидан пиёзни ёйиб қўямиз.

9. Навбатдаги қатлам сифатида картошкани жойлаймиз.

10. Унинг устидан сабзини соламиз.

11. Устидан тухумни қўямиз.

12. Сўнг қизил лавлагини соламиз.

13. Энг устига яна майонез суриб, қолипни олиб ташлаймиз.

14. Салатни таъбимизга қараб безатамиз.

Салат тайёр. Ёқимли иштаҳа!

Ушбу салатни тайёрлашда фойдаланилган маҳсулотларни Korzinka.uz супермаркетларидан харид қилишингиз мумкин.

Уларнинг нархлари билан қуйидаги жадвалда танишишингиз мумкин. Нархлар 8 декабрь ҳолатига келтирилган.

Рукн ҳомийси — Korzinka.uz супермаркетлар тармоғи.

Таомни тайёрлашда берган кўмаги учун Тошкентдаги RomAntica ресторани ва шахсан бош ошпаз Шуҳрат Исломовга миннатдорчилик билдирамиз.

Рукнимизнинг кейинги сонларида тунец балиғидан кранч-салат, олмали штрудель ва чизкейк тайёрлаймиз ҳамда улар билан Янги йил дастурхонини безатамиз.