Фаластинлик журналист Талат Алавий узлуксиз 50 соат давомида радиомарафонга бир ўзи бошловчилик қилиб, бу борада Гиннеснинг рекордлар китобига киришга даъвогарлик қилмоқда, деб хабар берди «РИА Новости».
«Рая FM» радиоси эфирига 24 ноябрь, душанба куни соат 13:00 да чиққан журналист чоршанба, 26 ноябрь куни соат 14:00 да дастурни якунлаган. Бу вақт давомида у ўнлаб одамлар билан суҳбатлашди: оддий ишчи ва тадбиркорлардан тортиб Фаластин миллий маъмурияти раҳбари Маҳмуд Аббос ва бош вазир Рами Ҳамдаллагача Алавийга интервью берди.
Радиомарафон давомида журналист фаластинлик эҳтиёжмандлар учун 18 та ногиронлик аравачаси ажратилишига, иккита уй таъмирланишига, Хеврон шаҳри туманларидан бирининг аҳолиси учун солиқ имтиёзлари берилишига, Иордан дарёсининг ғарбий соҳили ва Ғазо секторида 12 та кичик бизнес лойиҳасига сармоя киритилишига келишишга эришган.
Радиостанция Гиннеснинг рекордлар китобига берилган аризага 10 кун ичида жавоб кутишини маълум қилган. Бундан олдинги энг узоқ радиомарафон 2013 йил 6−8 декабрь кунлари ливанлик Рима Нажим томонидан 46 соат 20 сония давомида олиб борилган.
Изоҳ (0)