Ўзбекистонда банк-молия секторини барқарор ривожлантиришга бағишланган илмий-амалий конференция бўлиб ўтди

Ўзбекистон Республикаси Марказий банки, Ўзбекистон банклар уюшмаси, Банк-молия академияси томонидан ташкил этилган илмий-амалий конференцияда Ўзбекистон иқтисодиёти реал сектори корхоналарини модернизация қилишда банк-молия институтлари иштирокининг долзарб масалалари муҳокама этилди. Бу ҳақда Ўзбекистон Миллий ахборот агентлиги хабар бермоқда.

Ўзбекистон банк-молия секторини барқарор ривожлантириш масаласи бўйича амалий таклиф ҳамда тавсиялар ишлаб чиқишга қаратилган ушбу тадбирда Ўзбекистон Республикаси Олий Мажлиси Қонунчилик палатаси депутатлари, вазирлик ва идоралар, илмий-тадқиқот ва таълим соҳаси вакиллари, молия-кредит ташкилотлари экспертлари иштирок этди.

Ўзбекистон Республикаси молия вазирининг ўринбосари М. Мирзаев, Марказий банк раисининг ўринбосари А. Ҳайдаров, Банк-молия академияси ректори вазифасини бажарувчи А. Бекмуродов ва бошқалар Ўзбекистон банк тизимини ислоҳ этиш ҳамда эркинлаштиришнинг устувор йўналишлари, унинг барқарорлигини ошириш ҳақида сўз юритди. Банклар фаолиятини янада такомиллаштириш ва барқарорлигини ошириш, қўшимча инвестициялар жалб қилиш, кўрсатилаётган хизматлар кўламини кенгайтириш, аҳолининг банк-молия тузилмаларига бўлган ишончини мустаҳкамлаш бу борада муҳим омиллар сифатида белгилангани таъкидланди.

Тадбирда Ўзбекистон банк-молия секторини барқарор ривожлантиришга доир амалга оширилаётган чора-тадбирлар ижобий самара бераётгани қайд этилди.

«Ўзбекистон босқичма-босқич таркибий ислоҳотларнинг амалга оширилаётгани ва иқтисодиётнинг етакчи тармоқлари диверсификация қилинаётгани самарасида тараққиётнинг барқарор юқори кўрсаткичларини намойиш этмоқда, — деди Кеё университети профессори Шигео Кашиваги (Япония). — Бу эса экспорт маҳсулотлари ҳажми ва сифатини ошириш, саноат ишлаб чиқаришини юксалтириш имконини бермоқда. Ўзбекистон кичик бизнесга кредит ажратиш бўйича янада яхши ўринларни эгаллаши лозим».

Конференцияда экспертларнинг 40 дан зиёд маърузаси тингланди. Айниқса, иқтисодиёт реал сектори корхоналарига кредит ажратиш, ушбу корхоналарни модернизация қилишда фискал сиёсат механизмларини такомиллаштириш, фаол инвестиция сиёсатини амалга оширишда банклар иштирокини янада кенгайтиришга алоҳида эътибор қаратилди. Бундан ташқари, Ўзбекистон молия институтларининг бухгалтерлик ҳисоби ва аудит тизимини IFRS ва ISA халқаро стандартларига мувофиқлаштириш, пенсия ва суғурта жамғармалари маблағларидан фойдаланиш механизмлари самарадорлигини ошириш масаласи ҳам кўриб чиқилди.