Бир неча кундан буён Ўзбекистондаги мобил алоқа фойдаланувчиларига спам-хабар келмоқда, деб ёзади Uz24.uz. Унда бананни емаслик, мева Эбола вирусини тарқатиши ҳақида огоҳлантирилади.
Спам-хабарнинг мазмунига кўра, банан мевасини истеъмол қилиш хавфли ва ҳозирда уларни емаган маъқул. Гўё Москвада ушбу мева таркибида зарарли моддалар аниқланган. Ҳамда Эбола вируси банан етиштириладиган Африка мамлакатларида издан чиққанлиги эслатиб ўтилади.
Нашр Ўзбекистон Республикаси санитария-эпидемиология назорати бош бошқармаси билан боғланиб, масалага аниқлик киритди. Бошқарма бошлиғи Комил Муҳаммедовнинг маълум қилишича, Ўзбекистонга Африка мамлакатларидан истеъмол маҳсулотлари олиб келинмайди. «Хориждан маҳсулотларни олиб киришнинг барча жараёнлари қатъий назорат қилинади», — деди у.
Мутахассисларнинг таъкидлашича, бундай хавотирга ўрин йўқ. «Вирус Африкадан келтириладиган истеъмол маҳсулотлари орқали ўтиши мумкин эмас. Айнан банан орқали вирус юқиши мумкин, лекин вирус бизгача етиб келгунча ҳалок бўлади. Бундан ташқари, ҳеч ким тишланган бананни сотиб олмайди-ку», — деб қайд этди Россия Фанлар академияси академиги В.Малеев интервьюларининг бирида.
Эслатиб ўтиш лозимки, Эбола вируси 2014 йилнинг март ойида Ғарбий Африкада қайд этилган. Айни вақтда Африка ҳудудларида вирусдан ҳалок бўлганлар сони бир неча мингдан ошган.
Изоҳ (0)