3 сентябрдан бери омма олдига чиқмаётган КХДР етакчиси Ким Чен Ин пайларини шикастлаб олгани маълум бўлди. Бу ҳақда Шимолий Корея ҳукуматидаги манбасига таяниб Reuters хабар берди.
Унинг айтишича, Ким Чен Ин август охири — сентябрь бошида ўтказилган ҳарбий машғулотлар чоғида жароҳат олган. У ҳам ҳарбийлар қаторида машқларда қатнашиб, судралган, югурган, думалаган ва пайларини шикастлаб олган.
Манбанинг таъкидлашича, КХДР етакчисининг ортиқча вазни унинг тўпиғи ва тиззасидан жароҳат олишига имкон берган. «Дастлаб у оқсоқланиб юрди, кейин эса аҳволи ёмонлашди», — дея таъкидлади манба. Унинг аниқлик киритишича, қайта тикланиш учун 100 кунча талаб этилади. Шимолий Корея раҳбари давлат ишларини назорати остида ушламоқда.
Эслатиб ўтамиз, 10 октябрь куни Шимолий Корея етакчиси Ким Чен Ин Корея Меҳнат партияси ташкил этилганининг 69 йиллиги муносабати билан бўлиб ўтган байрам тадбирларида қатнашмади.
Аввалроқ Ким Чен Ин сентябрь ойида оғир операцияни бошидан кечиргани ҳақида хабар берилган эди.
25 сентябрь куни 3 ҳафтадан буён оммага кўринмаган Ким Чен Ин КХДР олий халқ кенгашининг навбатдаги сессиясида қатнашмагани хабар қилинган эди. Шу куни КХДР телевидениесида Ким Чен Иннинг оқсоқланаётгани кўрсатилган бўлиб, етакчининг соғлиғи жойида эмаслиги ҳам айтилган.
Изоҳ (0)