Япония сенаторлари Адлия вазирининг қизил шарфини муҳокама қилиш учун йиғилишни тўхтатиб қўйди

Япония Адлия вазири Мидори Мацушима йиғилишга қизил шарф тақиб келиб, парламент юқори палатасининг ишини 20 дақиқага тўхтатиб қўйди. Бу ҳақда Associated Press маълумотига таяниб, RT канали ахборот хизмати хабар бермоқда.

Вазирнинг либосини тўлдириб турган қизил шарф мухолифатчи гуруҳлар ғазабига учради. Гап шундаки, Япония парламентида палаталар ва қўмиталар йиғилишига устки кийим — палто, шляпа ва шарф кийган ҳолда ташриф буюриш тақиқланган. Бир неча ўн йилдан бери риоя қилиб келинаётган мазкур дресс-коднинг бузилиши палата иши тўхтатилиб, шарф сўзи нимани англатишини муҳокама қилишга олиб келди. Бу орқали депутатлар вазирнинг қоида бузган ёки бузмаганлигини аниқламоқчи бўлди.

Қизил рангни хуш кўрувчи Мидори Мацушима эса либосига депутатларнинг бу даражада эътибор қаратганидан ҳайрон бўлиб, қоидабузарлик қилмаганини айтди. Унинг фикрича, иссиқ тутувчи шарфлар билан аксессуар вазифасини ўтовчи шарфларни бир-биридан фарқлаш лозим. «Шарф — бу либосимнинг бир қисми бўлиб, у ҳар бир аёл учун урфга риоя қилишида ёрдам берувчи оддий буюмдир», — деди Адлия вазири.

Муҳокама жараёнида депутатлар, шунингдек, шарф ким томонидан ишлаб чиқарилгани ва мато сифати билан қизиқди. Кейинроқ палата вакилларидан бири Япония сенаторларининг парламентда шарф тақиш борасида бир фикрга кела олмаганини маълум қилди.

Палата йиғилишини тўғридан-тўғри эфирга узатувчи NHK телеканали бу вақтда телетомошабинларга сув остидаги қоя атрофида сузаётган балиқларни кўрсатишга мажбур бўлди.

Маълум қилинишича, юзага келган вазият аҳолининг норозилигига сабаб бўлди.