Швейцария олимлари фалаж ҳолатида бўлган каламушни биргина электр сигнал билан югуришга мажбур қилди. Тадқиқот натижалари Science Translational Medicine журналида тақдим этилди.

Янги Gait System тизими 2015 йилда орқа мия жароҳатланиши натижасида фалаж бўлиб қолган одамларда ҳам синаб кўрилади.

Фалажлик ва бошқа асаб билан боғлиқ касалликлар ҳужайралар ўртасида электр сигнал юборилишида тўсиқ юзага келиши натижасида пайдо бўлади. Бироқ айнан шу электр қуввати фалаж жониворга ҳаракатланиш имкониятини қайтарди.

Швейцария нейрофизиологлари каламушлар билан ишлаб, уларнинг орқа миясини ўртасидан иккига ажратиб, электродларни шу ерга ўрнатди. Тадқиқотчилар каламушнинг юришини ўрганиб чиқиб, ундаги электр импульсларни шундай ишлаб чиқдики, каламуш йўлда тўсиқ (зина ёки чуқур) учраганда, ундан бемалол ўта оладиган бўлди.

«Биз каламушнинг орқа оёқларини тўлиқ назорат қиляпмиз. Жонивор уларни умуман ҳаракатлантира олмайди. Бироқ электростимуляция кесилган орқа мияни ишга тушириб, каламушни табиий ҳолатдагидек юришга мажбур қилади», — деди нейрофизиолог Грегуар Куртин.

Олимлар энди қандай қилиб қўл-оёқлар ҳаракатини бевосита бош миядан берилган сигнал орқали бошқариш мумкинлигини аниқлашни режалаштирмоқда.

2015 йилда мазкур электростимуляция усули орқа мия жароҳатланиши натижасида фалаж бўлиб қолган одамларда махсус Gait Platform майдончаси ёрдамида синаб кўрилади. Мазкур майдонча югуриш йўлаги, таянч тизими, одам оёқлари ва умуман танаси ҳақида маълумот йиғувчи 14 та инфрақизил ва иккита видеокамерадан иборат бўлади.