2014 йилнинг 23 сентябрида Ўзбекистон Республикаси Ташқи ишлар вазирлигида Ўзбекистон — Литва сиёсий маслаҳатлашувларнинг навбатдаги раунди бўлиб ўтди. Ушбу маслаҳатлашувларда қатнашиш учун Тошкент шаҳрига Литва Республикаси ташқи ишлар вазири ўринбосари Роландас Кришунас бошчилигидаги делегация келди. Бу ҳақда Ўзбекистон Республикаси Ташқи ишлар вазирлигининг ахборот хизмати хабар бермоқда.
Томонлар сиёсий, савдо-иқтисодий, маданий-гуманитар ва бошқа соҳалардаги масалаларни икки томонлама алоқалар доирасида, шу жумладан, Ўзбекистон — Европа Иттифоқи шаклида батафсил кўриб чиқди.
Ҳар икки давлатда ҳам кўп қиррали ҳамкорликни кенгайтиришга катта эътибор қаратилиши ҳамда муҳим халқаро ва минтақавий масалалар юзасидан мулоқотни мунтазам давом этишидан манфаатдор эканлиги таъкидлаб ўтилди.
Тошкент шаҳрида иқтисодий ҳамкорлик бўйича икки томонлама Ҳукуматлараро комиссиясининг навбатдаги мажлисини келишилган вақтда ўтказилиши ўзаро манфаатли савдони кенгайтириш ҳамда «Навоий» эркин иқтисодий индустриал зонаси, «Ангрен» махсус индустриал зонаси каби хориж инвесторлари учун божхона ва солиқ имтиёзлари амал қилаётган ҳудудларда қўшма ишлаб чиқариш лойиҳаларини тадбиқ қилишга кўмаклашишига ишонч билдирилди.
Учрашувда томонлар Ўзбекистон ва Литва илмий муассасалари ва ўқув юртлари, маданият ва санъат арборлари ҳамда жамоат ташкилотлари ўртасидаги алоқаларни қўллаб-қувватлаш муҳимлигини таъкидлади.
Ташқи сиёсат идоралари вакиллари халқаро долзарб масалалар бўйича ҳам фикр алмашди.
Сиёсий маслаҳатлашувларда Литва элчиси Ренатас Норкус иштирок этди.